رحلة أبو سراج و مرته فتو للنماص .. (أربعة أجزاء) !!

هذه قصة بطلها واحد من ليتنا يقال له (غرم) وواحد من أهل جده يقال له (أبو سراج) سبق أن ذكرتها من عدة سنوات في إحدى المنتديات ..

الجزء الأول :

المكان / في عزومة على (الكورنيش) في جده .

والآن أترككم مع الحديث الذي دار بين الإثنين :

أبو سراج / حيووه .. الأخ من بيت الشهري ؟
غرم / هاه (تعيا مذا هي الروايا تيه ، ولكنه استدرك قائلاً أي وني من بني شهر من رجال الحجر .. وإنت من ذا أنت منه ؟
أبو سراج / محسوبك أبو سراج من النزله ..
غرم / حياك الله أنت وربعك .. وزيد .. أنا محسوبك غرم
أبو سراج / والله بيت الشهري وبيت العمري ناس طيبين ماتعرف محمد الشهري
غرم / أي وني أعرفه ماعندنا منه إلا واحد ! (كرررر هاق هاق : ضحكة غرم ، ماهو سهل !! )
أبو سراج / ديك المرة مراتي (فتو) أم سراج .. عزمتها زميلتها اللي معاها في المدرسة .. إسمها على ما أزكر (زانه) عندكم في الديرة .. كان عندهم يوميتها فرح في الصيف ( أخت زانه أو تعرس فيها تعزم زميلتها الأبله فتو..).
غرم / طيب وبعدين .. (قالها غرم بالمكاوي .. ما معك في الولد يعجبك)
أبو سراج / والله أخدنا بعضنا أنا وفتو والأولاد سراج وفتحية وفاتن وقلنا خلينا نروح نشوف الأوادم هادول زمايل فتو .. ونتفسح ونشم هواء ماعمرنا طبينا المنطقة هادي .. يعني حج وبيع مسابح .. مو كيدا ياواد غرم.
غرم / كيدا (حللللللوه منك ياغرم قدر يقولها بالمكاوي)
أبو سراج / والله ومشينا على درب الجنوب هادا .. وصلنا مدينة الباحة .. قلت لفتو .. زمايلك دولا هنا .. قالت لا لا ياأبو سراج مد رجلك شوية لقدام دولا في مدينة النماص .. والله ومديت ومديت وكانت مناظر في غاية الروعة .. شي مايصدق طبيعة وجو سبحان الخلاق العظيم .. لكن ياغرم وأنا بأوايق (يعني أشاهد) على الطريق ياخي كان عندي ملاحظات كتير ماني عارف والله!!.
غرم / مثل أيش يا معني؟.
أبو سراج / وأنا ماشي على الخط .. شايف لوحة مكتوب عليها (القوارير) .. وبعدين .. فيه لوحة تانية مكتوب عليها (ذات العلب) إيه دا ياخي علب وقوارير .. المهم هادا بسيط .. حاجة تانية فيه منطقة مكتوب عليها (الدقائق) أنا والله قلت أتر إنه واحد من زملانا هادا اللي أسمه (نبيل ساعاتي) منهم .
غرم / إيواه (غرم مشدوها) وبعدين؟
أبو سراج / كمان ياخي شايف أسماء قرى على الطريق أيش أقلك ؟
غرم / مثل ايش .. ماذا وتقول لي؟
أبو سراج / ياخي فيه لوحة مكتوب عليها (خميس العرق) .. قالها بفتح حرف العين .. وقرية تانية اسمها آل حشيش .. إيش قصدهم ؟
غرم / هذي قرية خميس العرق (بكسر العين) .. الله يهديك يابو سراي أفلحت بعيد .. والقرية التالية بكسر الحاء وفتح الشين وتسكين الياء ... يوووه منك يابوسراي!!
أبو سراج / أقول لك فيه لوحة على الطريق مكتوب عليها (لحبي) .. قالها بكسر اللام وضم الحاء .. أكيد قرية رومانسية كلها حب . وقرية ثانية اسمها (صدر) وكمانه (يد) .. من أعضاء الجسم !!
غرم / لحبي لحبي (بفتح اللام وتسكين الحاء) ويش الخرابيط تيه دادي بادي يابوسراي والله لا كنك تعرف العرب . والقرية التالية (صدريد)
أبو سراج / المهم ياخويه ياغرم .. طبينا النماص مدينة حلوة مره والله .. ورحنا عند هدولا زمايل فتو في حارة الله يديني إسمها ... (يحاول يفكر) ... إيوه إيوه حارة أبو بكر
غرم / إيه عند بني بكر الله يمنعك من أطراف النار يبو سراج قال حاره قال .
أبو سراج / والله وتقابلنا مع العمده حقهم (يقصد الشيخ) .. وكان ليلتها عندهم فرح (يقصد مرسام) .. راحت فتو والبنات عند زميلتها وأنا وسراج رحنا الفرح هادا .. بس ياخي أتهبلت !!! .
غرم / من أيش ؟ الله لايهبلنا
أبو سراج / ياخي في الفرح هادا اتهبلت دولا ناس بيعملوا حركات بهلوانية بالبنادق (قصده العرضة) الواد منهم (قال لك واد .. ماذا ويقولوا اليماعة) يرمي البندق لفوق ويمسكها باليد التانية يأخي مو زي المزمار اللي نعرفه .. وبعدين والله العظيم أتخضيت (يعني أرتعدت فرائصه) يأخي بيطرطعوا بالبنادق هادي والله بيطرطعوا كتير (الله يأخذ عمره آمين .. مذا أدراه)
غرم / الله يمنعك من أطراف النار يبو سراي وبعدين .
أبو سراج / ولا قبلين .. أنا والولد بنوايق عليهم لين خلصوا وبعدين قاموا فرشوا السفرة وجابو أكل في صحون كبار مصنوعة من خشب وأكلنا حاجة كدا بالسمن البري زي المعصوب بس لين شويه لكن حلو كتير .. أيش هوه هادا ؟
غرم / إيواه الله يمنعك من الدسم .
أبو سراج / المهم أنا اتبسطت وفتو أتبسطت والأولاد أتبسطو .. ياخي ديرتكم هادي مره مرررره حلوه وبيت الشهري كمانه ناس مرررره طيبين .

أنتظرونا في الجزء الثاني

يخليكم ربي

عاااشق النماااص