ضمّني للناظرين وضمّني

يا غلاي البُعد عقبك سمّني
واللقا ترياقها عن سمّها
ضمّني للناظرين وضمّني
للضلوع ليا حنانك ضمّها
وبعثر أطرافي وعاود لمّني
بالكفوف اللي حييت بلمّها
خصّني شعرك ، وحبّك عمّني
لبّا حبك والطروق وعمّها
وقلت لي : دامك معاي اتطّمني
والمها ما تجفل لركض المها
والعواذل حكْيها ما همّني
وش لي بناسٍ تدوّر همّها
ولو كلام أهل المذمّه ذمّني
والله اني ما دريت بذمّها
من قطفني غير منهو شمّني
دامني ورده تزين بشمّها
شالني كفّ الغرام وزمّني
مثل طفله تضحك لمن زمّها
الحبيبه.. والقريبه سمّني
ولاّ تدري؟.. انت ابوها وسمّها

جاذبيه