حلاة الرجل لا منه جـرح روحن يـداويهــا..!

أنا يعجبني الرجل الاصيل الشهم عالي الشان
عزيز النفس كسب الطيب عاده ما يخليها



واحب اللي بوقت اللازمه يصهل صهيل حصان
وتعجبنــي ريـاجيلٍ بعيــداتٍ هـقــاويهــا




واحب اللي ليا منه علا في جوه الدخان
يوردها حياض الموت روحه ما يداريها


الا منه قعد سلطان والا منه ركب شيطان
قوي الباس عرب الساس خيله ما يعفيها


واحب اللي ستر وجهه شراه بغالي الاثمان
الا من باعو الشيمه بغالي الروح يشريها



واحب اللي يخاف الله يجيك من العقل رويان
يشيـر بخير واهـل الخير للخيـره يدلـيهـا



واحب الشهم ممدوح السجايا صافي الوجدان
الا من جـوه ضيـفـانه على نفسـه يبديهــا


واعز اللي يهلي بالضيوف ويشعل النيران
وابي قولة هلا من قلب والعشيات ما ابيها



ابي الدله وابي الفنجال ابي الترحيب بالضيفان
ابي جلسة نشـامى راعي المجلس يقهـويها



ابي لي سالفة عدله معاها من الشعر قيفان
تشدك حكمة الاجداد يشدك صوت راويها



ابي النخوه وابي الفزعه واحب مجالس الشجعان
هـل الـعـادات والفزعــات نِـعم لا حــل طاريـهـا



هل الشيمه هل القيمه هل المعروف والاحسان
هل الـتـقـدير والتـأثير واللـي بيض اياديـهـا



واحب اللي ليا جوه النشامى يفتح البيبان
كريــمٍ من قـديم الوقت ليا صكت لياليـهـا



احب المرجله واصحابها واقدر الفرسان
بخيصٍ في معانيهـا قبل لبحث خوافيهـا



واعرف اللي يخوض المعركه لا صار بالميدان
يـمـشـيـهـا علـى رايـه ويـاخذهـا ويـعـطيهـا



واحب اللي سوالفهم ذهب موزون بالميزان
مـهـو خبلٍ يخم السالفـة بعـديـن يخـطيـهـا



واحب اللي رفع نفسه وجنبه مجلس الحقران
حشيـمٍ ما لقـى حشـمـه تـركهـا مـا يدانيهــا



عرف نفسه لزم حده ولا هاين ولا ينهان
الى من زادت اللجه يجنب عن بلاويـها



واحب من الرجال اللي يسمى شمعة الديوان
الا مـنـه تـحـدث كـل كـلـماتــه ينـقـيهـا



ولا احب اللئيم اللي تصيد زلةٍ بلســان
الى منه سمع زلـة رفيقه مـا يغطـيهـا



واحب اللي ليا سوى غلط قال العفو غلطان
( حلاة الرجل لا منه جـرح روحن يـداويهــا)



ترى اللي يشد في رايه على طول المدى خسران
يـضـيـع ولا يـطيـع ولا بغـاهـا مـا يـلاقـيـهـا ..




راقت لي فأحببت أن انقلها لكم(: