يقول من عدى على راس عالي

يقول من عدى على راس عالي
رجمٍ طويلٍ يذهله كل قرناس
في راس مرجومٍ عسير المنالي
تلعب به الارياح مع كل نسناس
في مهمهٍ قفرٍ من الناس خالي
يشتاق له من حس بالقلب هوجاس
قعدت في راسه وحيدٍ لحالي
كني براس الرجم مدهم و حراس
متذكرٍ في مرقبي وش جرى لي
و صفقت بالكفين ياسٍ على ياس
اخذت اعد ايامها و الليالي
دنيا تقلب ما عرفنا لهاا قياس
كم فرقت ما بين غالي و غالي
لو شفت منها ربح ترجع للافلاس
يقطعك دنيا ما لها اول و تالي
لو ضحكت للغبن تقرع بالاجراس
المستريح اللي من العقل خالي
ماهو بـ لجات الهواجيس غطاس
ماهوب مثلي مشكلاته جلالي
ازريت اسجلهن بحبرٍ و قرطاس
حملي ثقيل و شايله باحتمالي
و اصبر على مر الليالي و الاتعاس
و ارسي كما ترسي رواسي الجبالي
و لا يشتكي ضلعٍ عليه القدم داس
لا خاب ظني بالرفيق الموالي
مالي مشاريهٍ على نايد الناس
يا عل قصرٍ ما يجي له ظلالي
ينهد من عالي مبانيه للساس
و البوم في تالي هدامه يلالي
جزاك يا قصر الخنا وكر الانجاس
لا صار ما هو مدهلٍ للرجالي
و ملجا لمن هو يشكي الضيم و الباس
حسناك يا منشي حقوق الخيالي
يا خالق اجناسٍ و يا مفني اجناس
متى تربع دارنا و المفالي
و يخضر فياضٍ عقب ماهوب يباس
و نشوف فيها الديدحان متوالي
مثل الرعاف بخصر مدقوق الالعاس
و ينثر على البيدا سواد الزوالي
و يشرق جماله شرقة الصبغ بالكاس

محمد الاحمد السديري رحمه الله