مشيت وداخلي صوت(ن) يقول:لوين؟

وساوس


مشيت وداخلي صوت(ن) يقول:لوين؟
وانا اللي لا هدف لا غاية(ن) تمشي لها اقدامي
أسوق الرجل للمجهول للأقدار
واخليها كذا تمشي
ولو طال المدى او طول المشوار
على بالي حياة(ن) كلها اوزار
وكني من حياة آدم على بكرة
خيال افكار
جفاف(ن) كم تعب يستسقي المزنه
ولا حنت له الأمطار



وإنتي
آه يانتي
لا لمحتيني
ولا شفتك على دربي مقيل(ن)
قطرة(ن)
أزهار




وساوس تسألي وتجاوبي
حتى البشر حولي
واحسب اني أسولف معْك
وأسأل هاجسي اللي فيه أفكارك توسوس لي
متى أقدر أعيش خالي
بلا أفكار
أو أوهام



تعبت
وتعبت الأقدام
وانا أمشي
إلى قدام
كذا أمشي
بلا أحلام


تعديت المداين
والبشر غابوا
وماغابت
ألا ياللي على بالي
قتلتك
بس عشتي في هواجيسي
قلي لي
كيف أخنق ذكريات الأمس
يا وسواس
يا خناس



أحس ان الظما بحر(ن) يحاصرني
وتسللتي تحت جنح الوهم أوهام


تعبت
وتعبت الأقدام
وانا أمشي
إلى قدام
كذا أمشي
بلا أحلام




أنا الإنسان
يقولون اسمي الإنسان
لاجل انسى
وانا اللي ما قدرت انسى
وكيف انسى
وهو جرح(ن) يذكرني
وجع والام


وكيف انسى
وهذي قسوة الذكرى
وقلبي تاه وسط الموج
لا شاطي ولا مرسى
أنا الإنسان لحم ودم



حسدت الصخر
لا يشعر ولا يضجر
ولا ينسى ولا يذكر
ولا يحزن ولا ينضام


تعبت
وتعبت الأقدام
وانا أمشي
إلى قدام
كذا أمشي
بلا أحلام



ألا ياقسوة الماضي
وألم بكرة
خذ الذكرى
خذ الحسرة
خذ الماضي معك وارحل
وغادرني
وعني ما أبي تسال




وبعد ما كنت انت الروح
ابيك تروح
وخل القلب
خل الآه للمجروح



بقلم ... الشاعر .. حسن بن أحمد القرني ..