|| مشكلتك إنك .. ليا حنّيت زدت الطعون ,, ومشكلتي إني أحاتي تركتك من زمان ||

ماعاد في قلبي أشواق وغرام وشجون
................. الحزن والضيق ما خلوّ فقلبي مكان
البارحه . عقب ليل البارحه وش يكون
.................ما عدت أحاتي كسر بيرق وكبوة حصان
منك انت ياللي تعودتك .. خجول وحنون
.................في يوم فرقاك قل لي .. وين راح الحنان .؟
وادعتك وكل رمشه من هذيك العيون
.................يعيش فيني قلق \ ويموت فيني أمان
علّمتني كيف أعيش من الفراق أمغبون
.................وعلّمتني ويش تعني كلمة ( الأمتحان )
وورّيتني كيف دمعي ينزل من الجفون
.................وورّيتني كيف عشري تنقص أليا ثمان
ودّي أسامحْك عن غلطتك لكن شلون ؟
.................أسامح اللي عطيته كل وقتي .. وخان
ليتك بعد خنتني .. علمتني كيف أخون
.................عشان أرد إعتباري معك . وألا عشان
أضحك وأكابر واقول إنك : عزيز وتمون
.................( مع خالص الشكر والتقدير والإمتنان )
مشكلتك إنك .. ليا حنّيت زدت الطعون
.................ومشكلتي إني أحاتي تركتك من زمان
جميع حاجه تجي بعد المفارق تهون
.................إلا أنك تشوف روحك مع فلان وفلان


للشاعر / بدر العتيبي