بلاي إني أحبك

مطول زعلك وهقوتي ماقصدت أزعلك
أنا أزعل عيون من أجل عينك ولا أزعلها



على ما أذكر إني معتذر والعذر واصلك
أنا إلا الحبايب ما أقدر أقطع مواصلها


ترى خبرتي بك عمر ماني بمن يجهلك
وحقايقك شرهتها على من تجاهلها


تعود تشل خفافها قبل مايثقلك
ترى حبك أجبرني على شلة أثقلها


إذا إني على سبعين زله ومتحملك
من الواجب إن زليت زله تحملها


ألا ياوجودي منك في صدتك معجلك
مع إني لو أطلبك العجل ماتعجلها


ترفق بقلب ٍ شيمته تمنعه يخذلك
ولاهو بحق إن هقوته فيك تخذلها


بلاي إني أحبك ولا أقدر على مجاملك
مع إن ياكثر ناس ٍ نغض ونجاملها


ظميتك ولايرويني إلا صفا منهلك
والأرواح ما تارد على غير منهلها


طبيعي تغلى وإن تغليت فيحقلك
تغلى عيونك والتغلي يحقلها


تمثل بعيني حسن بعضك على مجملك
وخلد بها صوره من الحسن ما أجملها


أغمض عليها الجفن وأقفي بها وأقبلك
وتبين لك بعيني الى جيت مقبلها


أحبك وزدتك فالغلا عن محبة هلك
وتقانعت بك عن كل دنياي واهلها


ألا ياهوى قلبي عن القلب كيف أعزلك
أنا ما أقدر ادخل بين قلبين واعزلها


تجي منك فبكيفك ولكن بغيت اسألك
مدامك بعيني ليه قيمتك تنزلها؟