سجين القوافي

في ليلةٍ من ليال العمر باسفاري = مريت جده والزمن تطويه ساعتنا
الله ياجده وبك شوقٍ وتذكاري = يا شين حظي والحقيقة ما تواعدنا
كنت أتمنى طلةٍ للبحر وادواري = وارشف بكفي قطرةٍ تروي سواعدنا
سرت اتخيّل جلستك والموج بجواري = بس المنى لحظه . وصدتها حقايقنا
جيتك وانا مشتاق والعبرة بمشواري = فجأة تراجعت وعرفت إنا تباعدنا
يمكن أنا غلطان في ظني وبافكاري = مير الهوى غلاّب صاير فوق طاقتنا
بالطايرة سرت خايف وادعي الباري = يحفظ لنا جده . بحرها كل غايتنا
واوعدك انا يا بحر في نشوة الطاري = لازور شطك . بس ارجوك ساعدنا

يا زيـن هالدنيـا وشوفـت حلاهـا = ولكل واحد درب واضـح وهوجـاس
دنيا عزيـز النفـس زيـنٍ عطاهـا = يجني ثمرها طيب واحساس باحساس
ودنيا عريب القـوم يسعـد هناهـا = يبشر بحسن الذكر والعـرق دسـاس
وانا احمد الله دنيتـي فـي سراها= عندي حلاها غير عن باقـي النـاس
انـا سعيـد بقسمتـي فـي سماهـا = لبسي بها عزٍ ومن زيـن الالبـاس
واليوم انا يانـاس باعلـى علاهـا = قلبي غريق الحب من غير وسـواس
يا سعد حظـي يـوم قلبـي هواهـا = عز الله ان القلب دقت بـه اجـراس
بابقى حبيب القلـب وانشـد غلاهـا = لن الوفا فيها عرفتـه علـى سـاس
الله لا يحرمني مـن اجمـل وفاهـا = كل الأمل فيهـا ولا جانـي اليـاس
بانجن مـن قولـة حبيبـي بفاهـا = كلمه لهـا ذوقٍ ترصـع بالالمـاس

يا سيدي وش عاد بقيت فيّه = حرام تبطي شوفتك راس مالي
ياسيدي قلبي ترى مو بيديّه = القلب بيدك وانت فكري وحالي
الهم والضيقه زياده عليّه = والسبة إني قد فقدتك ليالي
الحلم ذ ا شفته ولك به هديّه = يا ليت تعرف وصفته والدلالي
شفتك بقرب القلب لا واهنيّه = من كان في قربك ويا ويل حالي
يشهد عليّ الله في حبك وصيّه = وصّابها قلبي لروحي عدالي

صادني طيفة وعلقني حنينه=شدني ذوقه وسوالي جروح
كلهم حوله وطبعاً حاسدينه=متنه اللي ميّزه وأبعد سروح
شوقي آنا له يدان وما يدينه=لني آنا من عرف جرحه جموح
كم لي أصبرفي هواكم يا رزينه=ما قدرت أعلن وأبّين لك طموح
لو يمد الكف ما أخيّب يمينه=صدقوني مدحته تسوى مدوح
منيتي يفهم وربي لا يهينه=علق الخاطر على سهل وسفوح

وش حيلتني لا جا على البال طاريه=ياناس والله مـا قويـت التناسـي
كم قلت أنا للنفـس بالله تناسيـه=لنه خلاص بديرته صـار راسـي
والشاهد الله له مكانـه وترضيـه=طال الزمن ولاّ قصر هو هجاسـي
مير الله أكبر كـل لحظـه تناديـه=وتعسفني الذكرى على غير ساسي
طبلتها قبل أمس وحلمت أنـا فيـه=حلمٍ خطيرٍ وصـل خـط التماسـي
مهما حصل يبقى حبيـبٍ ومغليـه=بحر المحبه له وسـوى مراسـي

الوعد صنته يوم هي راعية وعد=كل الوفـا فيهـا يزيّـن طلبهـا
هذي غزالٍ تجلب البدع والـرد=يا زينها يا حلوهـا يـا طربهـا
قد كنت خايف نلتقي منّها الصـد=لكن لطيف القلب يبقـى لقبهـا
هي صاحبة ذوق وهي راعية سد=سـدٍ منيـع للعواطـف شربهـا
متولع فيها من اول ومـن بعـد=يا زين قامتهـا وكحلـة هدبهـا

ياما عسفت الفكر فيها تعاسيف=وياما نظرت ليوم تغلي شجوني
متمسك فيها وأشد المجاديف=وأعطي الأمل يومه ولابه ظنوني
سبحان من فرق بصنف المراهيف=فيها الدلع صافي وطبع حنوني
ابنتظر واسمع لرد المحاريف=منها. ترى له قيمة في عيوني
وإن كان هي صدت وسارت تصاريف= كملتها بالصبر وأقضي ديوني