يا نخوة المفزوع وقت الهزائم

قصيدة اعجبتني ونقلتها هنا

إذا المراجل لبسـة شمـاغ وعقـال
قـل للعـذارى يلبـسـنّ العمـايـم

ما عاد يفـرق زول حرمـة ورجـال
دام الفعايـل تشبـه البعـض دايـم

المرجلـة مـا هيـب كلمـه وتنقـال
وتروح ما راحـت هبـوب النسايـم

وإلا خشونة صوت أو رفـع الأثقـال
أو رزة صـدور وفـعـل الـزلايـم

ولا هي بعد مفتـاح موتـر وجـوال
وإلا ردى لسانـن حديثـه شتـايـم

المرجلة شيمه عـن القيـل والقـال
رفيع نفس (ن ) حـر بالجـو حايـم

المرجلـة عقـلٍ وزن وزنـه جبـال
ودون العقـل وش فرقنـا والبهايـم

يا مسندي لو مايل الوقت بـي مـال
يا ولـد أبويـه يـا عظيـم العزايـم

يا معرب الجدين مـن العـم والخـال
يا نخـوة المفـزوع وقـت الهزايـم

المرجلة يا خوي هـي طولـة البـال
هي العـزم هـي الصبـر فالظلايـم

فيهـا الكـرم عـزه دلـة وفنجـال
فيها الكرامة عن ردى الطبـع شايـم

والدين لامنـه خـذا القلـب منـزال
مشى طريق الحـق وابليـس نايـم

ومن لا عرف ربه في طيـب الحـال
لابـد وقـت الضيـق بالهـم هايـم

حتى صلاتك مـع جماعـات ورجـال
في خيرها يـا خـوي نعـم الغنايـم

ولامن نصف ليلك قم صفـي البـال
يا عظم أجـرك بيـن ساجـد وقايـم

ولا من رفع ربي لـه كـل الأعمـال
حسن الذكـر لا قالـو فـلان صايـم

وخلك شريف القصد يا طيـب الفـال
سـوء المقاصـد فالبيـوت الهدايـم

واحذر تبيع النفس فـي دب الأنـذال
وتتبع خـوي إبليـس راع النمايـم

النفس خيـل لـك إذا كنـت خيّـال
ومن لا قوى نفسـه قوتـه الهزايـم

ولا صرت ما تدري لو يش أنت رجال ؟
صدق خسـارة فيـك ذبـح التمـايـم

الشاعرة نوف العتيبي