[[[[ الأجاويد عذاره ]]]]

طلبناك يا اللي عالم خافي الأسرار= وتعلم بما في داخل البحر وأسراره
طلبتك تجنبني دروب بها الأخطار= وجنب لساني هفوة الشعر وأخطاره
ومن بعدها مني سلام عدد الأشجار= وعد الزهر وعداد من يقطف أزهاره
سلام معطر عطر يذكر به العطار = من أحلى العطور ويعرف العطر عطاره
وكامل تحياتي تسابق مع الأشعار = يغني بها الشاعر وتحلى بها أشعاره
تقدم إلى اللي له مكانه وله مقدار = رفيع المقام وزايد حيل مقداره
وله في مجال الجود منزل وله تذكار = ويشهد على راعي المواجيب تذكاره
أبو صالح المعروف من خيره الأخيار = وهذي شهادة مجتمع يعرف أخياره
وأنا يوم دونت المعاني لها واختار = أدور على علم المطاليق واختاره
وطالبك أنا في العذر وان كثرة الأعذار = فقال المثل وأهله الأجاويد عذاره
ومن يزبن الأجواد ما همه المشوار = ولو كان ما في خاطري صعب مشواره
وقالوا هواة الشعر ما تنفع الأفكار = إذا كان راعي الشعر ما وظف أفكاره
وأنا شاعر وأكتب قصايد مع الشعار = ولكن هذا العصر يا كثر شعاره
وعند الحقيقة يا أبو صالح أنا محتار = وفي داخلي نفس مع الناس محتاره
إذا جيت أحسبها يمين تعود يسار = يعاندني الحظ الردي وأشهر يساره
ولكن بأصبر وأنت يا الصابر الصبار = تصبر فكم ناس على الدهر صباره
وفي الخاتمة مني صلاة على المختار = رسول بعثه الله للخلق واختاره