ودي أكلمك في موضوع.

تتفاجأ في يوم وأنت قاعد تقرا كتاب رومانسي و مشغل أغنية رايقة و سرحان في حبيبة مجهولة , إلا و أمك داخلة عليك و توها جايه من الاستراحة و تقولك: يا ولدي ودي أكلمك في موضوع.
ترد أنت بكل خوف : خير يمه؟
تقول أمك: ترى جارتنا ام خالد تبي تخطبك لبنتها. وأنت ماشاءلله كبرت و احلويت والكل يبيك. ها وش رايك؟
ثم تنزل انت راسك في الارض و تلعب باصبعك في شعرك (او شنبك) و ترد و انت مستحي و خدودك حمرة (هذا اذا كنت محلق اللحية) و تقول: ....
الشور شورك يا يمه إهئ إهئ

تقول امك: انا بصراحة ما اشوف في البنت شي. ماشالله عليها محترمة و وظيفتها زينه و راتبها ممتاز و من عائلة محترمة و من البيت للمسجد و من المسجد للبيت . ولا عندها سوالف السفر و الخربطة و ما تشرب خمر و لا تروح لاستراحات البنات. ولا دخااااان يعني بنت ما عليها.
تقول انت : بس يا يمه هي ما شافتني من اول. انا دائما متلطم بشماغي (والله عيب بس بكمل)
تقول امك: هي شافتك و انت نازل من باص المدرسة بس و سألت عنك و قالوا لها ولد سنع وتكانه ماهوب راعي أسواق ولا فيصليه ولا مملكه و كوفي شوب و ما يطلع إلا مع ابوه. (والله فشيلة بس بكمل)
و تراها هي و امها جايين يوم الخميس علشان يشوفونك.
تسال انت: طيب يا يمه ابوي وش رايه؟
تقول امك: ابوك ما يدري خله حايس في المطبخ وش يعشينا.
تقول انت :اللي تشوفينه يمه.
وتطلع امك من الغرفة
وتنط انت قدام المراية و تاخذ نص لفة يمين و نص لفة شمال تشوف جسمك و تمشط شعرك و شنبك بدلع و تقول : اه اخيرا حست و خطبتني. ( لا لا لا والله ما يصير بس بكمل)
و قبل يوم الخميس تروح انت لكوافير رجالي و تكون مسوي حجز و تقعد و تصبغ شعرك (ميش) و تحف حواجبك و تشيل شعر يدك و رجلك بحلاوة و تطلع زي فلقة القمر
وتجي البيت و تلبس الثوب اللي فصلته عند المصمم( ايلي صعب) لثياب الأعراس و الحفلات واللي فيه فتحة سقف قصدي فتحه من عند الساق و فتحه في الظهر و بدون اكمام (جبانيز) و ذاك المكياج وذاك العطر و تنزل للصالة
ويقولك ابوك : يالله دخل العصير على خطيبتك ترى امك ذبحتنا تسال عنك
تقول انت بكل خجل: واي واي يا يبه انا استحي
ابوك يقولك وهو يطق على كتفك و يضحك يا ولد روح لعروسك إهئ إهئ
تقول انت: يا يبه دايما تحرجني انت واي واي
و تأخذ صينية العصير و تخش المجلس اللي فيه البنت و تقول بصوت ناعم: احم احم الس سسسلام عليكم...... مشكله لو إنك دوسري كان على طووول تقوم تردح ههههههههههه (صاير حكيم على غفلة)
ترد هي بعد ما وقفت و عليكم السلام ( و هي تناظر فيك و في كل قطعة فيك)
و تقولها تفضلي
تقول هي: وش أحلى العصير الأحمر و لا الأصفر؟ بزعمها تبي تلطف الجو معك
تقول أنت: كله حلو
تقول هي: أكيد كله حلو لأنك أنت اللي مسويه
ثم تحط الصينية بسرعة و يدك على فمك و تضحك و تروح داخل بسرعة
إلا أخوانك يستنونك و يقولون: ها وشلون شكلها
تقول انت: واي واي تهبل تهبل حلوة و دمها خفيف و ذوق اهههههه
الا ابوك من المطبخ يلولش ويصاوي (يزغرط بالمصري) لللللللوووولللللوووووشششششششش مبروك يا ولدي
الا بدخله اختك العربجية من بره و حاطه عبايتها على كتفها و معلقة السجارة في فمها و تقول : خير وش فيه
يقوله ابوك : قصري صوتك في وحده داخل خطبت اخوك
تقول اختك: وهي وين شافت اخوي علشان تخطبه هاه؟؟؟؟ و تعطيك كف و تصرخ والله لالعن امها اللي جايه تخطب اخوي
الا بدخله امك و تسطر اختك كف و تطلع اختك بالسيارة و تفحط و تروح للاستراحة عند البنات .
و تمر الايام و انت تجهز ثوب العرس و الكوشة و بيت الزوجية و خلال هالفترة تمرك زوجتك بالسيارة تتمشون وتروحون التحليه وتوقفون عند كوفي تايم وتطلب موكا بالشوكلاته بكل خجل و تحاول انها تمسك ايدك و انت مستحي ( ومن هناك ودك و بتموت) و شوي تحاول تبوسك و انت تقول لا لا عيب احد يشوفنا( يعني لو ماحد يشوفنا ترى عادي)
و يجي يوم العرس و تقعد انت في الكوشة و كل الشباب حواليك يرقصون و يغنون على انغام وأحلام وصيته والعنود قصدي على أنغام طيران فرقة الشاطئ للرجال و طبعا مافيه زبيدة او صيته او العنود و سارة
وشوي الا العفسة قايمة : ترى العروس جايه
و ينطون الرجال و الشباب كلن يلبس شماغه و يتلطم
و تدخل العروس مع امها و خواتها (خواتها يتميلحون قدام الشباب ) و تقعد العروس جنبك و ترفع الطرحة (طرحة البسام بصمة خمسة) ههههههههه و تقولك: الله صاير مثل القمر
ثم تلف وجهك وانت مستحي
و يتم الزواج و بعد تسعة شهور الا انت تصرخ في الليل فيك الطلق
و يودونك المستشفى و تولد و تجيب توأم
وتطلع من المستشفى الى بيت اهلك علشان ينفسك ابوك (40 يوم)
و تأخذها زوجتك فرصة و تسافر مع البنات و يهيصون قبل ما تخلص مدة نفاسك الله يساعدك
و ترجع لبيتك تربي عيالك و تطبخ الغداء لزوجتك
وتتخانقون ساعات و تنام و دمعتك على شنبك تقطر اربع طعش سبع طعش ونص هههههههههههه
ويزيد حدة الخلاف و تاخذ شماغك و عيالك و تروح لبيت اهلك
و تصلح امك ما بينكم و ترجع الحياة مثل اول.