وقر العالم وتلقى لك وقار

بسم الله الرحمن الرحيم

السلام عليكم ورحمة الله وبركاتــه

وقر العالـم وتلقـى لـك وقـار........وإن حقرت حقرت لو إنك أميـر


هذا بيت مشهور عند كثير من النآس
حبيت أقدم لكم القصيـدة كآمله
إليكم هذه الرائعه اللتي سبكها الشاعر الكبير / مرشد البذالي _ رحمه الله _


~~ الرجال طيور ~~

الرجال طيور توصـف للحـرار=وكل طير فـي جناحينـه يطيـر
وين طير يحتري لـه كـل جـار=ووين طير يذعره صوت الصفيـر
وين طير لا نهض شـق الستـار=وين طيـر مايصيـد إلا الشريـر
لو تقـول إن الشجاعـة بالطيـار=كان فضلنا القطا عـن كـل طيـر
النداوي له علـى الفعـل اقتـدار=والحمامـة بالمحـارم تستـديـر
وإن جهلت الزين والجنس الدمـار=انشد اللي فـي معرفتهـن خبيـر
افتهـم منـي كـلام باختـصـار=فرق بين الصوف من سلك الحرير
وفرق بين الحب ونخال الشـوار=أصلهن واحد لاشك الـذوق غيـر
ربعة الطيـب تزيـدك بانتصـار=ترفعك رفع العمـد بيـت نظيـر
والردي عرفه مثـل بيـت هيـار=تنقبـر فيهـا ويدفنـك الحفـيـر
حقة الطيب تجيـك مـن الفقـار=والردي يعطيك كرسـوع البعيـر
لاترابـع واحـد بالعهـد بــار=وإن وفا مرة فهـو خيـر كثيـر
التجـارب خلهـا لـك مستشـار=لاتبي غير التجارب لـك شويـر
لاتجـي مدخـل يدينـه بالخبـار=مالقى صيـدة لقـى داب ضريـر
وانت في نفسك عليك الـدور دار=لاتحسـب إنـك مخلـى يافقيـر
وقر العالـم وتلقـى لـك وقـار=وإن حقرت حقرت لو إنك أميـر
والشرف لايستـوي فيـه انهيـار=الشرف هو مقضب السيف الشطير
والقناعة مرجلة والضعـف عـار=واطلب النجدة من الوالي القديـر
لاتجـي للنـاس طلباتـك كثـار=كـل ديـوان تجـي يمـه مغيـر
ماخبرنا في هـل الشحـذة تجـار=غير فقره كـل نفـسٍ لـه تعيـر
خل عز النفـس للعـورة ستـار=لو فراشك في طرف بيتك حصير
وانت للعـودة إلـى الله بانتظـار=واحـد مالـه وكيـل ولا مديـر
تجعل الوادي مريـف بالخضـار=عقب ماهو يابـس قشعـة هشيـر
الكريم معـان والفـارس مجـار=مدي الواجـب ونطـاح الذخيـر
والغنـى بالـذل مافيـه اشتهـار=والفقـر بالعـز لأمجـادك يثيـر
منزلك بالذل فـوق أعلـى منـار=ينتفضل عنـه مسكـان الحجيـر
مرقدك بالعز فـي حـزم القـرار=ينتفضـل بالمعـزة عـن سريـر
الغنى بالنفـس ماهـو بالصـرار=كـم غنـي كـن ماعنـده دخيـر
كم فقير فـي ثقيـل الحمـل ثـار=وكم غني سمعتـه سمعـة فقيـر
لا تقول فـلان يملـك لـه عقـار=ليش أنا ما أدركت مثلـه وأصيـر
واحد معطي ماهـو فيـك غـار=لاتجي لأحـوال خلـق الله نظيـر
ولاتقول الوقت لايحنـي صطـار=ضربـة خلـت دماغـي يستديـر
غيـرك الدنيـا تلوحـه بالحجـار=لين صار الدم مـن خـده خريـر
ضامـت الدنيـا مدللـة البـكـار=نازلين القفـر لـو جاهـم نذيـر
وانكشف برق مثل لـون الشعـار=يذكر الغزاي به عشـب وغديـر
جلعوا لـه مالهـم غيـره مـزار=في جهـام كنـه الصيـد المذيـر
وإن مشورك بالسلف والنشر سار=زمة الحيـران زاهيهـا النشيـر
حاسبـيـن للجـهـاد وللمـغـار=والبنـادق ماتخـبـى بالجفـيـر
كان شاط الهوش شيطات العشـار=جتـك أواليـد تعـزوا بالفطيـر
موتة عن قولـة الخفـرات نـار=العـذارى ماتعشـق اللـي ينيـر
وينهـم هالحيـن مامنهـم سمـار=ماتشوف إلهـم ورود ولاصديـر
مالـت الدنيـا عليهـم بانكـسـار=عقب مايضهد دبشهـم كـل بيـر
عقب شرب الدر من سور الحوار=هاجروا بالمدن يشرون العصيـر
والدبور إليا طبـخ قـدره وفـار=ذوب اللي فيه من حامي السعيـر
لـذة الدنيـا مثـل لعـب القمـار=لو جمعت المال شف تالي المصير
لوجمعت من الذهب حمل القطـار=عند نزع الروح ما أنتب له دبيـر
صار بين الوارثيـن بـلا مشـار=انعزل حق الكبير مـن الصغيـر
وانت حقك خامـةٍ عشريـن وار=حقتـك هـذي ولا فيهـا خشيـر
فصلوا منهـا حزامـك والـوزار=وأقرشوا بك يم مثـواك الأخيـر
وانسدحت من الفضا في وسط غار=يطـردك منكـر وقدامـك نكيـر
واهني اللي مشى طلـق الشكـار=سالم من ظلم عمرو ومـن عميـر
لـوه بالدنيـا بحـالات خـطـار=يرتجي بالآخـرة فرحـة نظيـر
مـن رحمـه الله وقبلـن العـذار=رحمة الله تغفر الذنـب الخطيـر
والأثيم من الصراط أقرش وعـار=إن سلم من ويل طـاح بزمهريـر
يـا إلهـي كـان مالـي إقتـدار=ألتجي في رحمتك وأنت المجيـر
الشباب أقفى وأنـا بآخـر نهـار=وأرتجي فزعتك يانعـم النصيـر

رحم الله قائلها
تقبلوا أطيب التحايــــــــــــــــــــــا