بــــاكر تموت من القهر لا نسيـــــتك..

راسك علامك رافعه يوم احاكيك

الظاهر اني فوق حجمك عطيتك



لحظه نبي نرجع دقيقه لماضيك

بذكرك في اي حــــــاله لقيتـــك



كان الضياع ودمعتينك تخاويـك

منهار وفي عز انهيارك خذيتــك



وارخصت عمري لجل احبك واداريك

هدمت قصر الذل فيك وبنيتـــــــك



كان الغلا شمعه تنور لياليـــــك

لو اضلمت دنياك جيت وضويتـــك



يالاسف كنت امدحك وافتخر فيك

رفعت من شانك وعليت صيتـــــك



كنت انت عندي غير وما اقدر اخليك


واموت واحيا ان قلت سم وفديتـك



واليوم اشوفك خنت حتى مباديك

صغرت في عيني وانا اللي هويتك




الضيف لو انه عدو معــــــــاديك

غصب عليك تقدره وسط بيتــــــــك



ياصاحبي بتموت ماني براجيك


واشره علي انكان حتى طريتــــــك



لاصار ذل النفس في قلب يغليك

يلعنك ياقلب عشقك وشريتـــــــــــك




اضحك حبيبي دام وقتك مسليك

باكر تموت من القهر لانسيتك