ردا على القرني - لا تركب الخيل دامك ما انت خيالي

اختلفنا في بعض المواضيع

فجاء هذا الشاعر ( ابو ماكن القرني ) يسب ويذم

ويقول لا ترد علي إلا بالطيب

وآخرها جاب قصيدة مدري سواها وألا نقلها ويقول رد عليها

وبكونه طلب الرد فمكان الشعر هنا ( الخواطر)

وما بدأت ولكن انتصرت

وحسبنا الله على من اضطرني لقول مثل هذا

__________________________________________________ ____

يقول

الناس سبحان من يعلم سرايرها

لاتعطي اسرار قلبك كل عزالي

الناس لاسمعت الكلمه تغيرها

تاهب عليها كلام وتاهب اقوالي

انشد عن اهل الوفاء دايم وزاورها

اهل الوفاء والكرم والمذهب العالي

وبعد عن اهل الخيانه لا تجاورها

لو كنت تسكن بشعب من البشر خالي

وهل الحسد والنمايم لاتسايرها

اللي سواليفهم في القيل والقالي

ترى الملاقيف ماحيا يشاورها

ولاحد(ن) يستمع لهروج نزالي

بعض الرجاجيل خلطاته يكثرها

ماله مع اهل الشرف والمدح منزالي

وبعض الرجاجيل نفسه ما يقدرها

ياحسرتي قولت ان افلان رجالي

__________________________________________________ ___

وهــــــذا الــــــرد

أعرف سلوم العرب إن كنت خابرها = عادات أهلي وعماني وأخوالي
عادات تصعب عليك إنك تسايرها = لا تركب الخيل دامك مانت خيالي
عند الجمايل وعند الطيب حاضرها = وأجود بالمال مهما ضاقت أحوالي
وأعتز بالضيف والفزعة أقدرها = وشيمة النفس من طبعي ومن حالي
أخاوي اللي لروحه قال تامرها = شهم-ن- كريم-ن- وقدري عندهم عالي
أعـز ناس-ن- وناس-ن- ما أجاورها = ما كل شخص-ن- عرفته صار لي غالي
وما تسكت النفس عن ضيم-ن- أخيرها = يا عيشة العز وألا الموت أشوى لي
هذي علومي ولا كملت لآخرها = يشهد لنا الناس من أول ومن تالي
واحفظ لسانك ترى أقدر أقصرها = إن كان عندك شهامة وأنت رجالي
لا يكبر الذنب ما تقدر تكفرها = تصفق عليها يمين اليد بشمالي
وأنا تراني من ( بني عمرو) تذكرها = دون الكرامة ودون العرض قتالي