ما بي قلوب الناس تحمل همومي

يا وقتي القاسي علامك تغليت
قمت أتغلى مع زيادة همومي

ويا هم ياللي في قلبي تماديت
من جور ظلمك قمت أشقق هدومي

ما تدري انك مع تماديك خليت
كل البشر تبجي علي قبل يومي

عزاه يالوقت الردي انا شسويت
صار الفرح عندي طواري حلومي

ما عاد أعرفه كود والخافق مبيت
صارت حياتي ليل أسود عتومي

ويا جرح ياللي تهت بالقلب وابكيت
تبجي شجاع من سلايل قرومي

أنا أشهد أنك بالغرابيل وفيت
يالله عسى ظلمك علي ما يدومي

اللي أبي أعرفه ليش رحت وتنحيت
لين استقريت بخفوق كتومي

واصدرت حكمك ظلم واذنبت وآذيت
وأمليت حكمك والخفوق محرومي

لكن ابصبر وانتظر حي أو ميت
حتى تصفي وتصفي غيومي

وان ما صفت في دنيتي ما توانيت
راضي البشر تبجي علي قبل يومي

ما أذكر بأني في حياتي تشكيت
ما بي قلوب الناس تحمل همومي