قصيدة / الهاجوس

يا بو محمد سرى في الليل هاجوسي
عزاه يا من سرى في الليل هاجوسه

جمر القوافي غضى و تحوسني حوسي
وانا مع القاف والهاجوس في حوسة

انشد و ما كاني الا بالعٍ موسي
و اثر العنى في خفوقي راكزٍ موسه

احسبني العب على الدنيا بمنكوسي
واثر الزمن لاعبٍ فيني بمنكوسه

في غربةٍ مالها حدٍ ولا قوسي
والبخت بي مايلٍ صوّبني ابقوسه

حزين والحزن في دنياي كابوسي
عزاه يا من يكون الحزن كابوسه

و ونّ ونة غريمٍ بات محبوسي
يخفي المعناة والدمعات محبوسه

من وقتنا اللي يقدّر جيب و فلوسي
و يعينك الله يا من شحّت افلوسه

لو كان قرمٍ و راسه يعتلي الروسي
المال واهله بهذا الوقت هم روسه

في ما مضى اهل الشيم والدين ناموسي
واليوم قلّ الذي في الناس ناموسه

يمشي الخطر حولنا و يدق ناقوسي
والشرّ في كل وادٍ دقّ ناقوسه

يجيك نفع الغريب وفقوها بوسي
ويروح واخر عهود الخشم به بوسة

ولا يجيك البلى ينخر كما السوسي
الا من اقرابك اللي مثلما السوسة

دنيا الفتى كلها تجريب و دروسي
ويعيش ما عاش يتعلم من ادروسه

يالله طلبتك ينير الحظ فانوسي
ونكون ممن ينير الصبر فانوسه

و نكون ساعين للخيرات وعسوسي
للشرّ غلاّقةٍ ما حن من اعسوسه

# ابو فارس #

1440/11/10هـ