تغريدات (1) ...

السلام عليكم و رحمة الله و بركاته

يسرني ان اضع بين ايديكم باقة مختارة من تغريداتي
والتي آمل ان تحوز على رضاكم واستحسانكم و اعدكم
ان شاء الله ببقات أخرى على ما ييسره الله لنا في المستقبل

بسم الله ......



ليت الزمن له عودة و استدارة
نسترجع الماضي لذربين الافعال

وقت الوفا والجود واهل النعارة
طلاقة في الوجه مع طيبة الفال

# ابو فارس #

********************
أدخل على الله ما نجي صوب دارك
لو تفرش السكة لنا ورد وازهار

خابرْك وانا كنت جنبك و جارك
واليوم مثل الامس يا طافي النار

# ابو فارس #

*******************
يا لعنبو الحاجة تحدك على اقصاك
كم ترخصك بين العرب و انت غالي

لكنها تعطيك شارات تخفاك
تكشف بها الناقص و كفو الفعالي

# ابو فارس #

******************
هرج القفا ما ضر يا كود راعيه
ممقوت من ربه و ممقوت مالناس

كده لغيره حتى لو هو يعاديه
إفلاس لا بعده ولا قبله افلاس

# ابو فارس #

*******************
اصد عن بعض الرياجيل تقدير
يخطي في البدعه واحنه من الرد

لانه عزيز و خاطره عندنا غير
أغليه وابعد كل ما يجرح الود

# ابو فارس #

********************
ايخونني التعبير في بعض الاحيان
حتى تقول ان الفتى ما نطق يوم

لا صار من حبيت يضوي بالاحضان
واقول يا معبودنا جعلهااا دوم

# ابو فارس #

*****************
الخاطر الضايق تسليه الاشعار
ياما من الابيات تبري الجروحي

من واقع فيه الهوايل و الامرار
شي يخلي البال ما عاد يوحي

# ابو فارس #

******************
بيت الشعر في مدح من لا يحقه
مثل الذي يشهد بزور و بهتان

والشاعر الظالم حلالاه طقه
وان تاب فالتوبة طهارة و غفران

# ابو فارس #

******************
الشهر قررب و المشاعر تحييه
يا رب نعطي حقه امن العبادات

لكن يجي و يروح والقلب لاهيه
نوم و سهر و نقارف اسوا التفاهااات

# ابو فارس #

*****************
حنا اختلفنا بس يا خوك في الراي
ما فيه شي موجب للقطيعة

لا تناظر الفايت و خلك مع الجاي
و ابليس تكفى جننبه لا تطيعه

# ابو فارس #

*******************
يصعب علينا الكفو لا اخطا طريقة
ودك تهب شي كبير ولا اخطاه

واما الردي جعله يروح ابحريقة
قليل في حقة من الخزي ما جاه

# ابو فارس #

******************
يا صاحبي و دنا بالمزح و الفله
في مجلس بالوفاء والطيب عمراني

سوالف تشرح الخاطر على دلة
و امنعني اتغثناا بفلان و فلاني

# ابو فارس #

******************
لا تحتري رد الجمايل من الناس
الا احمد الله كان جاتك سلامات

واطلب من اللي يكشف الهم و الباس
الأجر في ما اسديت في فايت فااات

# ابو فارس #

*******************
تدري و يش اللي يرفع الضغط و يغيض
و يجيب لك في الراس فك و شقيقة

لا.. كن من تدعيه يمشي على بيض
ودك تلـطّم خشته باي طريقة

# ابو فارس #

*******************
اسلك على وضح النقى دايم الدوم
درب توثق فيه كف الصداقة

وان عودت لك ريحة العود بالثوم
فخير من درب المتاهة فراقه

# ابو فارس #

*******************
ابليس اشوفه بعد في اقروبنا رييض
وده يغادر و عيا البعض لا يغادر

واللي يقول انت رح وابشر بنا انبييض
وجهك على ما تبي الوارد وفي الصادر

# ابو فارس #

******************
يا اصحبناا خلوا الزعل والمطامر
ميانة الاصحاب ما هي تحالف

حنا اجتمعنا حب نجني المثامر
الصف واحد والعصي ما تخالف

# ابو فارس #

******************
ليت القرابة تجتمع لو تصنّع
امثيل ما هي تجتمع فالمصيبة

لكنها فرقا و حقد مقنّع
واللي يدورها عسى الله يصيبه

# ابو فارس #

*******************
إما تكلمنا بهمز و غيبه
ولا السوالف سامجه ما بها ملح

هذي الحقيقة دون شك وريبة
نهدي عذوق التمر و ندور الطلح

# ابو فارس #

******************
كنت احسب ان سعيد باقي صغيّر
إن شفت بعض اولادنا في الجماعة

الورع يا دوبه ورى امه تسيّر
واليوم دقنه والشنب حلم ساعة

# ابو فارس #

*******************



وسلامتكم .....