أمواج متلاطمة

ياليل لو عمْيت عيون الذيب ماذاق الهزال
غير المصيبة في الزمان الصلف والحظ البخيل

ياليل لو ضاقت فجوج الارض بوجيه الرجال
ماضاقت صدور الرجال اللي لهم رايٍ دليل

ياليل ميزان المعاني غير ويحب الثقال
والاّ الخفيفة ماتقاس وكل زرعٍ له حصيل

النار تشعق بالحطب والهيل في صفر الدلال
والطيب في كف الكريم اللي يمدّه من قليل

واللي يسوقه للمراجل طيب عم وطيب خال
يثبت بوجه المعضلة ويبين لاختف الشليل

زكاة الأجواد احسبوها والخلايف في العيال
والمال مايغني بخيل النفس لو ساسه جليل

استغفر الله وأشكره واثني عليه بكل حال
وأعوذ به من شر نفسي قبل لحظات الرحيل

هبّي علي يانفحة الإيمان واعطيني مجال
أهدم قصور الظلم والطغيان بالسيف الصقيل

صحيح به شيءٍ يقال وشي لايمكن يقال
الصمت في بعض المواقف يجعل الشاجع ذليل

صارت بيوت العز مبنيّه على الجرف الهيال
والجوع سيفه يذبح الشيمة وناره في الفتيل

يلوح برقٍ من جنوب ويرعد الراعد شمال
وسهيل لامنّه دلق لاتنزل الوادي الوحيل

اشوف بعيوني مايجعل نومها صعب المنال
تهاوت الروس وجيوش الشر مسراها طويل

عليك ياوقتٍ غدت بيضاه ماتسوى ريال
الحنظلة تغرس ويحرق قلب باسقة النخيل

عليك ياوقتٍ غدت عوجاه للعالم مثال
حتى الرفيق اللي تجمّل فيه ماشاف الجميل