،،،يارب أنا عبدك،،،

يارب أنا عبدك ولا أدري وين أروح من الذنوب
والراس شاب ومن نوى طيبٍ بفضلك يدركه

عبدك دعيتك ضايقٍ صدري وتواقٍ آتوب
والنفس تدفعني لدرب الشر ماهي مدركة

يارب ساعدني وجنبني متاهات الدروب
اللي قضيت بها سنين العمر من غير بركة

بأمرك يارب الكون ياستير تثبيت القلوب
اللي تخوض بذا الزمان أشد وأشرس معركة

آروح وآجي لكن الدنيا كما خشفٍ لعوب
اللي يطاوعها تسوقه للذنوب وتشركه

كأن في عروقي نهر حزنٍ صار في نبعه نضوب
تسمع لجيش المغريات بساحة النهر حركة

صدري يضيق يضيق لين تميل شمسي للغروب
والضيقة اللي في خفوقي أقسمت ماتتركه

ثارت حروف الصمت والراوي على وجهه شحوب
والحرف يدرك مقصد الراوي ويعرف مبركه

فصول عُمر الأدمي فيها نجاحات ورسوب
فيها حقايق مثل مافيها غرور وفبركة

أسلمت وجهي لين زارتني نسانيس الهبوب
يانفحة الأيمان زوريني بفضلٍ أدركه