حبيب لي بالأمس واليوم ضدي

حبيب لي بالأمس واليوم ضدي

تايه غريب الدار من دون عنوان
أمشي ولا أدري وين دربي مودي

فيني علامات الشقا والتعب بان
حتى الزمان المرّ عيا يعدي

طويل دربي والبلا مابه أمان
مابين خايف ومتردد وودي

أخاف من ليلٍ يروع إذا حان
موحش ظلامه والنظر دوب حدي

أصبحت أنا من سبّت الدرب تعبان
والحال صارت للأسف في تردي

محدن أبد حولي ولا كاينن كان
أصيح وأسمع صوتي اللي يردي

يأسي غداله داخلي للأسف شأن
والنفس مضطربه وأنا أقول هدي

رحلت ما أبي للأسف شوفة إنسان
حبيب لي بالأمس واليوم ضدي

خليت له ديرة هلي غصب لو شان
حالي وصرت اليوم أنا في تحدي

أببتعد عن كل موطن وسكان
وأعيش أصارع جزر قلبي ومدي

وحدي أعيش الجرح مع زحمة أحزان
أتذكره والدمع يجري بخدي

تايه ولكن للأسف دون عنوان
أمشي ولا أدري وين دربي يودي