وين أنت ؟

حيا الله الصوت يا حيا الله الغالي
............... مبطي عن الصوت لبى الصوت واصحابه

من قبل تسأل حبيب الروح عن حالي
............... وين أنت شفني بعد فرقاك متشابه

وين انت عني وفي صدري من الصالي
............... جمر(ن) يشب الضلوع وحره اشقى به

ليلي نهاري وصبحي فيه غربالي
............... ويومي السنين الصفر / والوجد هلابه

كني وقوع المطر والسيل في جالي
............... يقطع طويل الدروب وغيري أسقى به

اروي ضمى اليابسه واموت بلحالي
............... ولا بقى غير طاري الوسم واعشابه

يقلون داله ؟ قلت بـ البال غالي
............... اشتاق لمواصله واعيش واحيا به

عسى المقادير ساعه بس تصفى لي
............... اشوف زوله وتهنى العين واهنى به

حاولت اعني خطاي آجيك ماجالي
............... يا من يلوم اللي يدور ديرة أحبابه

واللحين صوتك نفض بالصدر زلزالي
................ انعش خفوقي ونسى القلب ما صابه


وسلامتكم