غريب الوطن والوطن صوت وصدى

اخواني وأخواتي هذه القصيدة هي عبارة صوت وصدى بين المواطن الغريب وبين الوطن
وقد قام بإنشادها المنشد المعروف ( مهنا العتيبي ) وقريبا تسمعون الصوت هنا بإذن الله تعالى

غريب =الوطن
يا وطن جريت لك صوت الغريب=من تركتك كن في قلبي رماح
وطنه =الحبيب
يا مواطن ليه ما تبقى قريب=كان قلبك من بلاويه أستراح
غريب= الوطن
المشاغل شأنها شأن عجيب=واكثر العالم ورى لرزاق راح
وطنه =الحبيب
دارك اللي فيه تلقاء كل طيب=فيه كم تسمع لحيا عالفلاح
غريب= الوطن
يا وطن ما فيه حيلة فالنصيب=والصحيح الصبر مما شفت باح
وطنه =الحبيب
كل من سافر غداء قلبه صويب=منت وحدك يا فتى بالهم صاح
غريب= الوطن
لا ذكرتك يا وطن دمعي صبيب=واصبحت فالقلب دقات الجراح
وطنه =الحبيب
كيف تنسى موطنك دار الحبيب=الذي رباك في درب الصلاح
غريب=الوطن
لو نسيتك والله إن أمري عجيب=في بلاد الغرب فكري فيك لاح
وطنه =الحبيب
موطنك يوصيك عنه لا تغيب=أنت شريانه ودرعه والسلاح
غريب =الوطن
افتدي طينك ولو بان اللهيب=لو تروح الروح لجلك لا جناح
وطنه =الحبيب
المواطن لو رحل وضعي صعيب=والعدو يفرح ويعلن لنشراح
غريب =الوطن
كلنا في ساعة الصيحة نجيب=والعدو نعميه من بعد القراح
وطنه =الحبيب
يا مواطن فيك ظني ما يخيب=جعل توجيهك يخاويه السماح