هل أصبح فعل الخير يجلب المصائب..؟؟

في بداية الصيفيه الماضيه قررنا السفر
وفي اليوم المحدد لسفرنا تأخرت الرحله
رغم تأكيد الحجز لمدة 7ساعات
أثرنا العوده للمنزل على البقاء في المطار
الى وقت الرحله الثانيه وكأن لتأخيرنا خيره ولله الحمد..
ــــــــــــــــــــــــــــــــــــــــــــــ
لما وقفنا عند باب البيت وكان الوقت الســـ1ـــــاعه بالليل
شفت من بعيد حرمه تركض في أحد الشوارع الفرعيه بالحي
وشايله معها طفله وشنطه واكياس فقلت للسواق:
الي معنا الحرمه هذي وراها شئ..؟؟!!
فقالوا الجميع: الله يكفينا الشر ادخلي مالنا والمشاكل
فقلت :لاوالله يمكن البنت الي معها مريضه وتبغى احد
يوصلها المستشفى ..وأصريت البقاء ومراقبتها
ويوم لاحظتني أراقبها أخذت تركض فركبت السياره
وأقتربت منها وكانت على جهه معاكسه من الشارع
الي انا فيه لما زاد شكها اني بأتوجه لها اوقفت سيارة ليموزين
وركبت بها.. فلحقتها لاني شكيت انها خاطفه الطفله ..
حدينا الليموزين بعد مطارده ونزلناها واول ماشفت عباتها
مقلوبه تأكدت من هروبها بالطفله ..
والبنت ملابسها متسخه اكرمكم الله
سألتها وين بتروحين ولمين هالبنت
قالت: أمها اتصلت عليه في البيت وطلبتني
اتوجه بها للمول الفلاني وكان هالمول قريب منا
قلت مول بهالوقت اصلآ قفل 12ومافيه أحد
وين بيتكم أوصلك
قالت: في الحي الفلاني وذكرت حي في جنوب الرياض واحنا في شرقه ..
نزلت البنت ومسكت شنطتها قلت مايبغى لهابتهرب..
مسكتهاوبالقوه ركبتها وهي تصيح
وتوجهت بها لمركز شرطه حينا..
بعد التحقيق والتصفيق اعترفت انها هربت بالبنت بنية خطفها
وتسليمها لعصابة نيباليه في الحي الي ذكرته..
وانها ماتعرف البيت قال لي الضابط كثر خيرك
خلاص خليهم عندنا وروحي ..
رفضت اسلمهم البنت لوتفوتني الرحله ..
وكانوا مجموعه من العسكر شباب وحسيت بخوف
على البنت منهم حتى انهم ضحكوا فقلت اضحكوا والا خلوا
والله ماأفكها الا في يد اهلها اما الخدامه ففداكم قالوا ليه
قلت : مع احترامي لهالمكان مالكم امان..
ساعتين واحنا ننتظر البلاغ ولاحياة لمن تنادي..
قلت مالكم الا تدقون على اهل الخادمه وتجيبون رقم الكفيل..
وبالفعل جابوه وأتصلوا عليه وكان له
ربع ساعه من يوم عرف..
أثاري الام نايمه والشغاله كذبت عليها وقالت :باروش البنت
وانيمها ويوم تأكدت ان الام نامت هربت من البيت..
وفجأه الا ضابط نزل من سيارته يركض ويتعثر
الين دخل المركز والله مانسيت الخوف الي في وجهه
وبكاءه وحسيت انه ابو البنت ..
قال عاري بنتي والخادمه الي هربت فيها وينهم..
فبشرناه انها موجوده فاغمي عليه من الفرحه دقائق
وصحي وشاف البنت وانخرط في نوبة بكاء ..
موقف من أصعب المواقف الي مرت عليه..
شكرنا ووالله انه يقبل رجلين الرجال
من الفرحه اعزكم الله
وأصر اني اتعرف على امه واهله وقال
فـــيّ بنتكم ووالله ماانسى لكم هالمعروف..
وسلامتكم ..

ـــــــــــــــــــــــــــــــــــــــــــــ
السؤال هنا:
الكثير تفاعلوا مع القصه ثم عتبوا على
تصرفي وقالوا بغيتي تورطين نفسك..؟؟
مآ رأيكم أنتم هل تصرفي صحيح أوخاطئ ولماذا ..؟؟
لوكنتم بمكاني هل تبلغون اوتسكتون وتقولون مالنا دخل ..؟؟
طبعآ بتقولون ليه مابلغتي وانتهت مهمتك باقولكم لان الشرطه بتجي تحقق معي
وعلى بال ماتخلص الاوالشغاله أختفت بها..

الله يحفظنا واياكم من كل سوء..