ابتعد عن سيرة انسان ما يشكر وفاااك

العشير اللي يبيعك ويتجاهل عطاك=أشهد إن البعد عن عشرته خير كثير
ابتعد عن سيرة إنسان ما يشكر وفاك=وانتبه تتعب شعورك لمعدوم الضمير
من تجاهل في حقوقك وسارع في شقاك=اتركه وش يجبرك في مخاواة الحقير
واحد ما يرتضي لك سواء درب الهلاك=والله إنه ما يفيدك ولا هو لك عشير
الصديق الصادق اللي يساهم في رضاك=عامله بالطيب حتى ولو بذله قصير
يكفي إنه يعتني فيك ويقدر غلاك=والليالي تكشف أسرارها شر وخير
الذي يذكر جميلك ويتناسا خطاك=ذاك فعلا رأس مالك وهو نعم الخشير
بادله طيبه وحاول تحطه في سماك= ون تعنا لجل عينيك فافرش له حرير
من وفاء لك في حيانك وبالغ في ثناك=ليه تتناسى جميله وهو قدره كبير
كان تذكر عيب هذا وتجهل حق ذاك=فانت عقلك في مقاييس صدقانك صغير