الأربع بنات

بسم رب البيت جلت قدرته=العظيم اللي تعالت عزته
واحد عمت عباده رحمته=الذي بامره تسير الكائنات
يا لبيب العقل حاول تستمع = قاف بن لقفص يعم المجتمع
المآسي في وسطنا تجتمع=والخلايق في تعايشهم شتات
واحد فيهم حياته عاشها=ما عرف صكاتها وهواشها
دنيته له باسطات فراشها=في حنان وعاش في عز السبات
وواحد ذاق الحياة بمرها=خيرها فاته وصابه شرها
المآسي كل أبوها مرها=عاش عمره بين هاك وبين هات
ودي أحكي عن ظروف مطلقة=وارملة واللي تعيش معلقة
كلهن ظروفهن محلقة=في سراب وما نسيت العانسات
كم سمعت مطلقه يرثى لها=تشتكي يا ناس قسوة حالها
والظروف الكايدة تسعى لها=كنها طافت جميع الموبقات
أسهرت جاراتها صيحااتها=واحرقت لكباد من وناتها
كم لها تزداد في زفراتها=قفلت قدامها كل الجهات
لو نشدناها عن أسباب الطلاق=قالت الرجال وضعه ما يطاق
كل يوم في شجار وفي شقاق=واختلاف في مسائل تافهات
لا بغيت أفهمه لجل اقنعه=كش فيني ثم سكر مسمعه
كلها دنياه صارت معمعة=ون دناه الليل في المقهى يبات
بس بعض الناس عنده قاعدة=إن كل مطلقة هي فاسدة
ويلكم يا اهل النفوس الحاقدة=تقذفون المحصنات الغافلات
قاعدة خابت وخاب أصحابها=والرذيلة لا رحم من جابها
كل عذرى تفتخر بحجابها=ليس كل مطلقة من هالصفات
بعضهن تسوى سرية كاملة=في شرفها في حياها شاملة
بيدها المصحف وهي له حاملة=هي من اللي قيل عنهن قانتات
والبعض لا والله إلا خايبة=عن شرفها عن حياها غايبة
طال ماهي عن خطاها تايبة=اعتذر لو قلت ضمن الفاشلات
وارملة وش ذنبها وش جرمها=بعد فارسها تزايد همها
والنفوس الخايبات تذمها=ليه صارت في عداد الخائنات
ليه ما تقرب وتخطب يافتى=لا متى يحملن أساهن لا متى
ويش بعد الصيف عيرك يا شتى=ساعدوا من هي تعيش الكايدات
ثم لا ننسى ظروف معلقة=كنها في وسط غرفة مغلقة
عائشة في وسط نار محرقة=ما درت وش حالها بين البنات
كم رديْ علق فتاة طيبة=لن نفسه يا جماعة خيّبة
ما لقى شخص صريح عيّبه=لجل يتجاوب بدون معاكسات
والعوانس مشكلتهن مشكلة=كل بيت فيه بنت مركلة
ما لقت رجال تصبح ملك له=الشباب أغلبهم أدمن مسكرات
ودي أساهم بشي من معي=لست أنا ذاك الأديب الألمعي
بس لشكوى توطت مسمعي=واتجاوب لظروف القاسيات
يا رجال اش عذرنا في عرضنا=لا تناسينا مآسي بعضنا
ديننا ما هو فقط في فرضنا=ديننا وصى بستر الصالحات
واجب منا نقف في صفها=كل عذرى يا سنافي عفها
حسب شرع الله شفوفك طفها=لا تخلون العذارى تايهات
التعدد حل يا كل أجودي=والعدالة من تركها معتدي
والبطل بامر المره ما يقتدي=النشامى يصنعون المعجزات
لبن لقفص والحوالي والقصيد=جولة في عالم الذوق الفريد
والقصيد يصاد واحيان يصيد=والجزالة رأس مال المفردات
هذي القصة وهذا نصها=للبنات الأربع ابغى أخصها
في ثناياها قصص واقصها=وقفة للطيبات الغاليات
عارف إني ما وفيت المطلبي=واعتذر للي صديق واجنبي
فالختام أقول صلوا عالنبي= يا حضور ويا جميع الحاضرات