زين المعاني

ياللي تقول القافية مارتكت لي
كم شاعر غيرك يقول ارتكت له


القافية يابو شبيب أشتكت لي
من حالها ياكم سوايه شكت له


حتى إنها من جور ناس بكت لي
لا بد ينصف حالها من بكت له


زين المعاني غيرها ما حكت لي
ياللي يقول إن الهزايل حكت له


حاولتها حتى إنها ادكتكت لي
والشايب الوجعان وش دكد كت له



لا شفتها ياصاحبي شربكت لي
اعطيتها اللي ما بعد شر بكت له


طويتها بسياستي واضحكت لي
واللي يجيب سيساته مضحكت له


ياللي تقول ابغى من أقوالك تلي
أقول هذا النص بمكانك تله


صكيت بيبان بها صكصكت لي
حتى قصور الشوق ما صكصكت له



إما تجيك اليوم والا أوشكت لي
عبّر معاني كلمته واوشكت له


يوم المعاني يا فتى شبّكت لي
قبلي كثير سيرته شبكت له


حبكتها يا صاحبي واحبكت لي
عساه يسمع واحد محبكت له


ياللي تقول البخترة دربكت لي
غيرك سمعها بس ما دربكت له


الساحة اللي شافته باركت لي
واللي ينال الجائزة باركت له