منظوري ..

ماهزك الشوق ولا حرك شعورك
انا اشهد انه لعب في حسبة شعوري
ياخالي القلب ياقسيك وياجورك
حكمتني بالهوى والحكم جمهوري
ماصابني منك لاصدقك ولا زورك
اجي معك بالجميل وتنشب بزوري
ان كان هالناس مستويه بمنظورك
انا انكسر من بعد فرقاك منظوري
لو هي على الكيف كان اجيك وازورك
واضم لون الورود وريحة الجوري
دقيت بابك قبل ماينهدم سورك
وانهيت دورك قبل ماينتهي دوري
سفينتي لو تتوه بغبة ابحورك
باسفط اشراعها واشب دافوري
مانيب مغرور لكن صرت مغرورك
وانا ماهوب اي حاجه ترضي غروري
نورت ياصاحبي والنور من نورك
آمَر لجلك واجي واسجل حضوري
واثرك تقلب علي وتضبط امورك
طلعتني بالغلا والحب من طوري
مقدور ظلم الحبايب وانت مقدورك
ترمي بسهم العيون وموتها فوري
عود على من هواك وصار مهجورك
واشواق قلبه عليك تفوح الغوري
للحين انا ماسك اعصابي وباشورك
شوري عليك انتبه لي واستمع شوري
والا علي الحرام ان اهدم جسورك
واعلمك ويش معنى حكم جمهوري