كنت معهم !!

بسم الله الرحمن الرحيم
السلام عليكم ورحمة الله وبركاته

مريت باحد المخططات واذا بي ارى سيارة ابني واقفة . قلت امر اسلم ومنها اتعرف على اصدقائه !

لا اخفيكم ترددت قليلا تجنبا للاحراج لهم ولكن قلت امر امر والله المستعان .

صفطت سيارتي ونزلت وكانت مفاجأة لهم اربعة شباب في العشرينات وجاهم شايب في الخمسينات وش السالفه ؟

سلمت عليهم وسلموا عليه وقلطوني .

حاولوا احضار شيء اعتذرتهم وشكرتهم وقلت الحاضر يكفي .

فصفص ، تشبس ، حمضيات ، مــــاء ، وترمس شاهي .
وجبة الشباب المفضله .

مكانهم كان راقي ومشرف على ماحوله .
اخذت فنجان شاهي وكم حبة فصفص وقلت لهم :

ما احب اثقل عليكم خذوا راحتكم لكن شفت سيارت هذا الرجال قلت امر اتعرف عليكم واسلم وامشي .
ولكن قبل امشي لي سوأل واحد .

ايش اللي مجلسكم هنا ؟

قام احدهم وقال :
ياعم نحن الشباب ( عنصر مفقود ) .

قلت : فيزياء الشغله ؟

قال سمها على كيفك .
نروح المولات قالوا عوائل .
الحدائق قالوا عوائل .
افضل الاماكن في السوده والحبله والمسقي والسحاب عوائل .

طيب اين نروح ؟

مالنا الا الارصفه هذا اذا تركتنا الدوريات في حالنا .

من حقنا نجلس ونضحك ونمزح ونصيح ونخرج ما بداخلنا ونعبر عن انفسنا ونلعب وهم يقلون ياتجلسون سكوت يا تذهبون من هنا !
حتى البيوت ما نقدر نجتمع بها والاستراحات غالية ولا يأخذها الا اناس معينين .

قلت : طيب وش الحل من وجهة نظرك ؟

قال : يخصص لنا اسواق نتسوق بها ويمنعون العوائل .

فوالله اننا نعاني من بعض الشابات اكثر مما يعنين هن منا .

ويعمل لنا ملاعب ومتنزهات واستراحات باجور رمزيه نقدر عليها يحددون في المتنزهات كا السودة والحبله وغيرها يوم لنا ويوم للعوائل .
كرهونا حتى في عوائلنا وارغموا الشباب على الكذب واصطحاب ( خويه ) لتدخله الاسواق .

قلت وش الخويه ؟

قال : هناك بنات ونساء عند ابواب الاسواق بلأجار عطها كم ريال وكأنها قريبتك وادخل معها السوق الين تتعب ثم اخرج وهي تدور زبون اخر .

قلت : معقول هذا والا تمزح عليه ؟

قال : هذا الواقع واللي مومصدق يذهب الى الاسواق الكبيره ويتابع .

قلت : والحل .

قال : شيء من الالتفات للعنصر المفقود والاهتمام به حتى يكون موجود فاذا كان موجود قدرت تراقبه وتتابعه وتستفيد منه بدل ما تحاربه .

لا اخفيكم اعجبت بهذا الشاب وشكرته واستأذنت من الجميع وركبت سيارتي وانا افكر .

فعلا لماذا هذا الاهمال الغريب للشباب واعتبارهم عنصر شر يجب فقده من المجتمع ؟ ثم نقول شبابنا فيهم وفيهم .

اليس كان من الاولى الاهتمام بهم وكسبهم والاستفادة منهم واشغال اوقاتهم بما يفيدهم ؟

كنت معهم وحبيت انقل لكم ما فهمته منهم فماهو رايكم انتم فيما سمعتم ؟

اسف على الاطاله ولكنه الواقع . والسلام عليكم .