كل ٍ وله بين المخاليق سيرة !

كل ٍ وله بين المخاليق سيرة=والرجل ما طـوّله ياكود الافعال
وكل ٍ له اجدادٍ بنوا له مسيرة=والابن ياخذ من عمامه والاخوال
كم رجل ٍ اشهر له ربوع ٍ وديرة=ولايخلّـد في الزمن غير الابطال
وكم رجل ٍ اصبح في قبايله عيرة=محسوبْ مابين الهلايم والانذال
الرجل لاصارت عزومه كبيرة=حطه على يمناك في كل الاحوال
ينفعك لاصابتك في الدهر حيرة=واذا اتكلت عليه في العلم رجّال
ويكون عونك في الامور الخطيرة=ما هوبٍ لاعوبٍ ولا هوب ميّال
(موسى) طلب (هارون) يصبح وزيره=يوم ٍ درى انه للثقيلات شيّال
وافضى اليه بحاجته والسريرة=فكان له نعم الخوي يوم الاهوال
خل الذي يعجز لحمل الصغيرة=خله بعيدٍ عنك يتريح البال
وقت السعات الله ما اقوى هديره=ووقت الشدايد جعل ما هوب لك فال
خيرة من اهل الكذب والغش خيرة=واهلاً بمن يمشي على الحق مازال
والحق من يميشه ما شيْ يضيره=ولايتوه الا كذوبٍ ومحتال
واللي كذب فحبال كذبه قصيرة=مؤرخ ٍ هذا بتاريخ الامثال
ولابد يلقى كل عبدٍ مصيره=والخاتمة دايمْ على قد الاعمال!