:: تو .. طين ::

:: تو .. طين ::

وش عاد يا دار ٍ بها صار ( توطين )=و في مكتب التوظيف سوسن و ميسون !
مديرهم مدحت و نائبْته نسرين=و على الرسبشن حمّص و فول و زيتون !
كل ما اتصلت اسمع ( الو مرحبا مين ؟=بدّك وظيفه ؟ .. مين دلّك على هون ؟ )
اقول انا لي اتصل صار شهرين=و انتوا وعدتوني متى بس توفون
اسمي ( مواطن ) ( جامعي ) طيب و زين=كني ابخطب عندكم و اتّغلون !
عندي شهاده طايحه بكبدي سنين=عشش عليها شي له ستة عيون !!
لو للشهاده لسان قالت ( على وين=ناوي توديني .. تلف فيني الكون ؟ )
من كثر ما صورتها غارق بدين=للهندي راعي المطبعه صرت مديون
لا ليلي ليل ولا نهاري نوى يبين=دقيت راسي لين ما صرت مجنون !
مطلوب خبره عالأقل في مجالين=ولا تجينا بواسطه و سير مدهون !
ولا انثبر في بيتك .. افرك بكفين=يومك يشابه امسك و عيش مغبون
تعدادنا ويّاهم عشرين واربع ملايين=و اهل البلد للحين ما صاروا مليون !!
ويلاه من باكر اذا وضعنا الحين=و احنا اقل من الربع حالنا شجون !
و اللي ابتسم له حظه والله مسكين !=حصّل وظيفه .. بس في وين .. تدرون ؟
ساكن في الجوف.. حطوه في الرين!!=و اللي سكن في الرياض.. في السلع مدفون !!
يشوف اهله بس في الأسبوع يومين=و اذا حسبتوا الدرب كم ساعه .. تبكون
يعني في كل احواله ذاق الأمرين=شغّال محزون و بلا شغل محزون
و الأجبني اللي راتبه فوق عشرين=فله و سياره و تذاكر .. و طاعون
عنده بدل كل شي عالراتب الفين=حتى بدل معجون اسنان و صابون !
و من بعد ما يجمع من بلادي فلسين=و يربّي م القعده على الكرسي بطون
و يصير في بلاده غني و عنده برجين=يرحل و هو جاحد .. و كم مثله ملعون !
و حتى الجماعه قوم مدحت و نسرين=مردّهم لبلادهم لو يطولون
يرضون بشوية دراهم .. و شفتين=صبح و عصر .. لو حتى في الليل يرضون
بس لو سمعتوا همسهم بينهم بين=وسط القهاوي يلعنون و يسبون !
لا تحسبوني عنصري .. كلنا طين=و الخل لو عاتب محبينه يمون
داري و انا اولى بها من الغريبين=ما يوصلون لحبها لو يموتون
و ( الأقربون اولى ) .. كلام ٍ من الدين=ما جبته من شعري مع الهام و ظنون
ولد البلد ما يبغي لبلاده الشين=بالروح بالدم يفتديها ولا يخون
لكن سؤاله يوم قلتوا له ( توطين )=يا كيف بيد الغرب توظيفه يكون ؟؟!!
شعارهم معروف ( راجعنا بعدين )=و باين من التأجيل .. انهم يخافون
اذا معك خبره .. يا اهلين و سهلين=و اذا شهاده بس .. عنك يصدون
ما عندنا شاغر .. و بطلنا تعيين=ولو تحرق الهاتف ترى ما يردون !
من وين اجيب الخبره ؟ من وين من وين ؟=دام الوظيفه عند سوسن و ميسون !
عندي بمطبخ بيتنا خبره سنتين !=تنفع اذا صاروا المطاعم يوطنون ؟؟!
ولا اهاجر و آخذ الخبره في الصين ؟=صح العيون صغار .. لكن يقدْرون
سؤال يا دار ٍ ..صراحه بترضين ؟=اني اسافر و اطلب الغرب لي عون ؟
و سؤال يا ناس ٍ على الراس و العين=صدق الوظايف واسطه و سير مدهون ؟
اما الجواب الشافي يجيني الحين=و هاتوا تأشيره .. اذا كنتوا ترضون