خذتك نجد وغبت واشغلت بالي

ماعاد لي من بعد روحتك غالي=كل العرب صاروا بعيني رخيصين
سيطر عليّ اليأس ياصعب حالي=تشابهت عندي جميع العناوين
تعبت اردد في غيابك سؤالي=وانشد (غيابك) كيف حال البعيدين؟
العهد لاتنساه يا (راس مالي)= الحب ماينساه كود الجحودين
ترى غلاك بخافقي لايزال ِ=والله ما انسى الحب والعهد يازين
قبل الفراق القلب مرتاح سالي=واليوم دمعي ساكن ٍ محجر العين
اصبحت اسير الحزن مما جرى لي=في غيبتك يابو عيون ٍ مزايين
ياما اجتمعنا في المحبة ليالي=كنا بها بين البشر اسعد اثنين
ايام كان الوصل سهل المنال ِ=واليوم وينك ياحبيبي . . وانا وين؟
خذتك (نجد) . . وغبت واشغلت بالي=واصبحت من بعدك كسير الجناحين!!!