فايت المدى

انا طالبك يا الله يا سامع الندا
إله كريم ما اقدر احصي وهايبه
تيسر لي اللي فايت ساقه المدى
وقفى بحظي بعد بارت ركايبه
فأنا من صدوف الوقت غنيت عالحدا
ماهو من طرب لكنها النفس ذايبه
سلكت الطريق الصعب واحسبه قدا
واثار الطريق الصعب تكثر نشايبه
وجاملت خلاني وحاذرت من العدا
وسامحت منهو شن صوبي حرايبه
وعودت نفسي تمحق الغل والردى
وتقبل على المعروف في كل نايبه
أسالم لمن سالم وأحييه لا بدا
وأدور على العليا مع كل صايبه
ومن سار بالفتنه له الباب مؤصدا
وأنا له نصوح صح ما نيب سايبه
وعلم الفتى في الشور لامن غدا غدا
يروم الطوال ويجتنب كل عايبه
يجاوب على اللي سار صوبه وينشدا
ولا صد عنه وقال ما اعرف طلايبه
وشيمة عقيد القوم لا قام وأقتدى
بسنة رسول الله وأرضى قرايبه
ولا غش في الذمه وميل عن الهدى
ولا طاوع الشيطان وأخفى سبايبه
ويمناه وقت العسر تقطر من الندى
وكلمة هلا يا ضيف ماهيب غايبه
يباشر بها الضيفان ويقدم الغدا
ولا نسي من عمه وخاله وشايبه

غرمان بن عزيز