بَريّة ماهي بيرة !

بدون مقدمات
جات ع البال فقعرناها هنا وسلامتكم
مع اعتذاري سلفاً فهي دون مستوى الذائقة احبابي


يَا الله يا من لـــه التدبيــــر والقُـــــــدرة
يَ واحـــد(ن) ما نســير إلا بتـدبيـــــره

تغفر ذنوب امس واحسن لي عمل بُكرة
العُمـــر ولّى ربيعـــــه يا الله الخيـــــرة

صحيح يعجبنـي التشــخيص بالغُتـــــرة
واحب اســـوق القـــدم من ديرة لديـــرة

وصحيح لاشفت زين انســـاق له مُكـره
واذا عشــــقت آدمي تذبحـــني الغيـــرة

لكن فكرى حشـــــــا ما لوّثـــه سَكـــرة
كيفي على الريق بريّــــة ما هي بيــرة

لا هِبت عــــاوي ولا ترهبني الهَــــدرة
واللي كبيــــرة تنوخ عنـــدي صغيـــرة

ما اخاوي اهل الدنا ! إلا اخاوي النُـدرة
آصون لصحاب واحـــافظ على الجيـرة

اجـــامل النــاس , لا نحســـد ولا نكــره
وإن بـــذّنا واحــــد(ن) دسـنا منـــاخيره

إن كان في سِلمنـا انّ الحُب من نظـــرة
الحــرب في شــــرعنا تبــــدأ بتكبيــــرة

اخفيت بيت القصيـــد آخـاف من شطره
يجرح مشاعر غشــيم(ن) ما لقي طيره

الستر مطلــوب والخافي ورى السُــترة
والســرّ مدفون مهما طــالت الســــيرة

مادام بيــــــد الله التدبيـــــر والقُـــــدرَة
مالي مفـــر(ن) من اقــــداره وتدبــيره



لكم كل التقدير والمودة والاحترام