احوال عامه

يا مصعب الحاجه إذا صرت محتاج
وبنودها في كف راعي البخاله
ويا مصعب الكذبه إذا صرت هراج
واللي سمع لك فاهم كل حاله
ويا مصعب الصحبه إذا جاك منعاج
ويلازمك ويصير جالك بجاله
ويا مسعدك لا صرت في مكه وحاج
تحج وتصلي بيسر وسهاله
ولا تضايق في المواقيت حجاج
وتساعد المحتاج لو تعب حاله
وأنا على ما قيل لي هاجس هاج
بالشعر والحكمه وخير المقاله
وان صرت يا فكري في الشعر دراج
أدرج على نهج الحكم والجزاله
ولا تضع من دون الاشعار مزلاج
إلا إذا صارت بعكس العداله
يوم القصيد أحيان في لبه اعلاج
وأحيان يلقى من سعى به زواله
وحنا نسير وداعي العين ما ماج
عن الصحيح وطيب الله فاله
ونخفي حوايجنا على شأن الاحراج
ونقدم الشيمه من أجل الجماله
ونمشي مع الأصحاب في خير منهاج
ولا سعينا في دروب الظلاله
وندور الدله مع فلة حجاج
في مجلس مكتض بأهل الأصاله

غرمان بن عزيز