شاعر من بعيد يهديكم هالمتواضعة

ليت حزني ماتفيأ ظلال القلب لين
صار نبضه يجذب التيه ويزيد وجعه

مابقى للنفس رغبة ولا للدمع عين
الفقير يشوف حلمه يموت ويتبعه

النوايا الطيّبة تكسر الضلع المتين
والكذوب يشب ناره بزنده وأصبعه

آلمتني ضحكة اليأس في وجه الحزين
واوجعتني كلمة الصدق لانها موجعه

وقتلتني كلمة اللاش عند الشامتين
ومنعتني عزة النفس مجلاسي معه

ورفعتني قولة الحق بين الطيبين
كل نهرٍ فيض خيره أساسه منبعه

في جبال الصبر تنحت رياح الحاقدين
كن زليل أصواتها صوت سفنٍ مشرعه

خاتمت ماطال يقصر وعاد الصبر زين
والغبش لي صار في العين لازم تدمعه

ان بلاك الوقت بتشوف غيرك مبتلين
وان جمعت المال مثلك كثيرٍ تجمعه

وان سمعت الناس تقرض بعرض الغافلين
مجلسٍ يجمعك معهم لزومٍ تقطعه

المجالس بالأمانات وأدرك يافطين
من يحاول يقنعك بالخطأ لاتسمعه

ان دعاك لمجلسه فاعتذر عذرٍ سمين
مثل ماقال المثل خل كلٍ وسنعه

والردي لاتستمع من حديثه كلمتين
له لسانٍ في هل الطيب بالزور إذرعه

وان لمحت الكُرْه بعيون من حولك يبين
(السعة لابارك الله في الضيق السعة)