إلى سعادة خاطري المجروح ..!

السلام عليكم ورحمة الله وبركاته

أحد الاصحاب شكى لي بعض همومه وشاركته الهم بهذه القصيدة وانا واياه قد نكون في نفس الوضع سيّان ..


ي سعادة خاطري المجروح تكفى لا تضايق
لايهمك اي جرح الجرح مهما كان يبرى

قد مايوجَعْك علمني اكون انسان فايق
وانتبه للّي حواليّه مع الايام يجرى

ي كثر من حاولوا في الدرب لي يبقون عايق
والقليل اللي معي بالدرب ماينوون غدرى

كم حبيب كنت اعدّ انه لقلبي حب لايق
واكتشفت انه يخون وقال قلبي منه حذرى

والرفيق اللي اعدّه كفو صار اليوم بايق
ليتني ماكنت احسْبَه في الوفاء افهم وادرى

دورة الايام ي قلبي ومابين الدقايق
تنكشف بعض القناعات وتبين وجيه قشرا

والقرايب آه منهم كم انا للمر ذايق
جرعوني اياه وانا اظن منهم حلو مجرى

والطعون اللي تجيني يوم ماكنت اتوايق
ماتوقعت انها من عم له يدّين يسرى

مالي الا الصبر لو ماني لهذا الوضع طايق
في حياة مالقينا منّها للحين بشرى

ي سعادة خاطري انسى وعيش اليوم رايق
دام في درس الوفاء مافيه من يكتب ويقرأ

أتمنى ان تروق لكم متابعيني الكرام ..!