حوار بين المهندس والراعي - لبعض الناس فقط-

يقال أن شابا وسيما لطيفا حنونا
ومهندس في مجال الكمبيوتر وعنده خبرة جيده في التكلونوجيا الحديثه
هذا الشاب قرر ذات هبقة ان يزحف الى البر في نزهة بسيارته الفارهة ذات الاجهزة المتطورة
انطلق الشاب مع أخوياه أو خوياته ما هو شغلنا المهم انه توقف في البر عند راعي غنم مسكين
قرر الأخ أنه يكتشف هذا المخلوق القديم في نظره اللي يرعى الغنم في البر والناس وصلت الى مراحل من الحياة الفارهة المريحه ,,, خلونا نشوف وش صار؟؟؟؟
الشاب : السلام عليكم يا عم ( طلع عنده شوية أصول )
الراعي : هلا ولدي
الشاب : ممكن أسأل عمي
الراعي : تفضل قول اللي بخاطرك
الشاب : يا عمي قولي بصراحه ليه أنت مع الغنم هنا في البر الموحش ذا ما تشوف عيشتك مقرفه ومطفشه وقاسيه عليك ليه ما تروح المدينه وتشوف الناس كيف عايشه هناك الحين

الراعي : اسمع يا ولدي أنا مرتاح هنا أكثر من المدينه وعيشتي مع غنمي هنا أفضلها على عيشة المدينه وخيمتي هنا بالبر أحسن عندي من فلة في المدينه

الشاب : طيب كم عدد غنمك ذي يا عمي
الراعي : كثير زي ما تشوف
الشاب : تتحداني أجيب لك عددها بدون ما أعدها
الراعي : هات عددها واذا جيت به صح فلك واحد منها هديه
الشاب : طلع الكمبيوتر المحمول المتصل بالاقمارالصناعية وجاب مكان الغنم وقام يستعمل التقنيه حتى جاب عددها الصحيح
الراعي : صدقت يا ولدي تفضل واختار منها واحده

دخل الشاب بين الغنم وقام يختار حتى اختار واحده منها وشالها على السيارة ومشى ,, فصاح الراعي وقف .. وقف .. وقف
الشاب : هلا وش تبي
الراعي : انا بسألك وإذا ما جاوبت رجع اللي أخذته
الشاب : طيب اسأل
الراعي : هذا اللي أخذته وش هو خروف أو نعجه او تيس أو عنز
الشاب : مدري والله
الراعي : طيب نزل كلب الغنم يا داجه
(((((((( طبعا فيه ناس بتقعد لي في السالفة وبتقول .. آها الكلب ما نبح ما عضه .. شوف الكلب طلع أخرس ما يتكلم هاه وش عندك .. أما انه ما عضه فالشاب جابه بطريقه حنينه قوي لطف خلى الكلب يموت في الرومانسيه اللي زي كذا ابو الغنم على ابو راعيها

هذا الشاب في تفكيره أنه أحاط بكل شيء وبكل شؤون الحياة وعندما احتقر مهنة الراعي عرف أنه لا يفرق بين الخروف والنعجه والتيس والعنز وكلها عنده تحت اسم ((غنمايه )) وعرف أن همبرقر اللحم اللي طايح فيه مصدره من عند الراعي وأن الكباب والمشويات اللي ياكلها في أرقى المطاعم برضه من (غنمايات الراعي) وان الجكيت اللي لابسه والجزمه كانت خروف يروح ويجي مع الراعي وأن كثير من الصناعات تقوم على أكتاف هؤلاء اللي محتقرهم
لكن أفضل شيء تعلمه أنه قدر يدرس أصعب تخصصات الكمبيوتر لكن لا يستطيع أن يحل يوما ( ما ) محل صاحبنا الراعي
((( قد علم كل أناس مشربهم ))

سعيد بن عبدالله -