مواصفات عروسة

سلامي عدّ ماهلّت .. غيومي وامطرت بالنـار = على دنياي وابتلّت..ثيابـي بالهـوى الكـاوي
مابـي مـن بنـات اليوم..بنـتٍ قلبهـا دوّار = بنتٍ عندهـا قربي..وطـول البيـن متسـاوي
ابيها لقمّتي تعشق..وتقطع في هـواي اسفـار = ابيها في الهوى تغرق..وتشوا به وانا الشـاوي
ابيها للوفاء معنى..اذا صـار الزمـن غـدّار = ابيها تهجر المغنى.. ولا تاكـل وانـا طـاوي
ابيها تلملم جروحي..ولا تسأل وش اللي صار = ابيها توأم لروحـي.. اذا صـار القـدر لاوي
ابيها تسير في دربي .. ولا تسأل عن المشوار = ابيها تقتحم حربي..تضـمّ الجـرح وتـداوي
ابيها في الحسن آيه..اذا خذنا الحسـن معيار = ابيها ترسم التايه..على وجهـي وانـا ثـاوي
ابيها جوهـرة تلمع..بيـاض ورقـة الابكـار = ابيها من الدلـع ادلع..ابيهـا ريحـة الجـاوي
ابيها تحكي وتحكي..وتحكي لي حكايا صغـار = ابيها لا حكت تحكي..عيونٍ صارت الـراوي
ابيها واحدة تجلس ..ويجلـس قبلهـا الطيّـار = طويلٍ في السواد ادمس.. على اردافها هـاوي
ابيها ترمي اللثمـة..ولا تلبـس نقـابٍ ٍحـار = ابيها تمطر الحشمة..على ذيب الفـلا العـاوي
ابيها تلبـس الغطوة..وعزّتهـا هـي الستّـار = سواد الليل ملبسها..وجوهرها هـو الضـاوي
ابيها تكـون عمريّة..وبيـتٍ بالكـرم عمّـار = ابيها تكون نشميّـة..ولا عـن دونهـا نـاوي
ابيها تكون سلّطانة..سلاطين الجنـوب كثـار = ابيها تكون ريّانة.. اذا قالـوا الغصـن راوي
ابيها تكون شيهانة..واكون لوحـدي الصقّـار = ابيها تكون طربانة..اذا قلت الطـرب هـاوي
ابيها تصبّ لي القهوة..وتوقف عند راسي يسار = ابيها تمتلي نخوة..ولا تشكـي مـن الكـاوي
ابيها تتبع الموضة..وتسمـع آخـر الاخبـار = ذكية تاخذ اللي به..صـلاح وتتـرك الغـاوي
ابيها تجهل الكورة..فلا تدخل معايـه شجـار = وتبدأ المشكلـة الكبرى..هلاليّـة ونصـراوي
ابيها ملهمة لا قلت..شعـرٍ جاوبـت بأشعـار = ابيها ملحمة لا جار.. ذيبٍ في الخلا الخـاوي
ابيها خادمـة لا قلت..أمـرٍ جاوبتنـي صـار = ابيها حاكمة لا صار..شـوري للدنـا نـاوي
ابيها طفلةٍ تلعب..على خـدّي تخـطّ ازهـار = ابيهـا دمعـةٍ تتعب..ابيـهـا ملـجـأ الآوي
ابيها تحترق غيرة..اموت بهاجس اللي تغـار = تموتني اذا شافت ..عيونـي لغيرهـا تـاوي
ابيها تحتمل نوحي..اذا عربد جنونـي وثـار = ابيها تحتوي بوحي..اذا ضاق الفضا الحـاوي
ابيهـا تعتـرف اني..حـرّ وسيّـد الاحـرار = ابيها تعترف اني..عزيـز النفـس مأسـاوي
ابيها تعترف اني..وقفـت ولا وقـف شعّـار = ابيهـا تعتـرف اني(محمد)والهوى قـاوي