شاب عمل حادث وتوفت وانفجرت قريحته بهذه القصيده المحزنه!!!

قصيدة كتبها شاب عمل حادث سيارة و والدته كانت معاه وكان مسرعا

نتيجة هذا الحادث

الوالدة توفت نتيجة الاصابات الخطيرة

و هو إصابته كانت خفيفة
لاحول ولاقوة الابالله
و هذي الأبيات قالها للي يواسونه
---------------------------------------------


يواسيني وانا الميت وحالي يجبر الدمعات

تسيل من الذي فيني ويبكي وهو يواسيني

وانا ابكي واتنهد وارسم بالحزن لوحات

يجبروني عشان امشي ورجلي ما تمشيني

قتلت رعايتي بيدي قتلت الحب والرحمات

حرمت النفس من حقها وانا ابكيها وتبكيني

وكنه حلم قدامي يقيدني من الصرخات

ابي اصحى ولكني عجزت القى اللي يصحيني

فداك القلب يايمه ومهما قلت من كلمات

صغيره في كبر حقك بس اتمنى تعذريني

نهبت الفرح من بيتي صحيح اني خسيس الذات

صحيح اني ولد طايش وكل ما أسمعه فيني

تجول عيونهم فيني تفصل مني قياسات

وتشيح وجوههم عني وكني غيرت ديني

يظنوا حزنهم اكبر وهم اصحاب هالمأساة

وانا اتحدى اذا فيهم ربع ما يحترق فيني

نقص قدري بعد موتك وغابت نشوة اللذات

وصار الهم عكازي اباكيه ويباكيني

عطيتيني بدون حساب ولا سمعتك تقولي هات

وانا اشرب حيل من دمك ودمك ما يكفيني

يايمه ارجعي كافي ابجلس معك لو لحظات

واقبل ايدك ورجلك وافرش لك رمش عيني

يايمه ما تحملهم يقولوا فات ما قد مات

تعالي غيري هالقول واطيعك باقي سنيني

واترك عادة التدخين وانفذ ما تبي بسكات

واصلي الفجر في المسجد قبل منتي تصحيني

يايمه ارجعي تكفين وطفي شمعة الآهات

ابيك انتي ولا غيرك على موتك تعزيني

وضميني وداويني مثل ما كانت الهقوات

ما ابي احدن يواسيني ابيك انتي تواسيني

دخيلك بس لا تبكي اذا شفتي بي الدمعات

انا مقوى ابكيك اذا انتي تبكيني
--------------------------------------

تحياااتي
بنوته ناعمه

الله يجبر مصيبته ويرحم والدته .

صراحة .. قصيدة نابعة من عاطفة صادقة وجيّاشة ..

لا هنت ولا عدمتك ..

BNOoOTA NA3MA

يعطيك العافيه على هذا الاختيار الموفق وذكرتيني بقصيده للشاعره عابرة سبيل لزوجها وكانت هذه القصيده بمثابة وصيه له وكانت

فعلآ قصيده مؤثره نظرآ لعظمة الموقف :





ترى الذبايح وأهلهـا مـا تسلينـي
...........أنا أدري إن المرض لا يمكن علاجه

أدري تبي راحتي .. لا يا بعد عيني
..........حرام ما قصرّت يديك فـي حاجـه

خذها وصايـة وأمانـة لا تبكينـي
.........لو كان لي خاطر ما ودي أزعاجـه

أبيك في يديك تشهّدنـي وتسقينـي
........أمانتك لا يجـي جسمـي بثلاجـه

لف الكفن في يديك وخـل رجلينـي
.........ما غيرك أحد كشف حسنه واحراجه

أبيك بالخيـر تذكرنـي وتطرينـي
.........يجيرني خالقك مـن نـار وهاجـه

سامح على ما جرى ما بينك وبيني
........أيام نمشي عـدل وأيـام منعاجـه

عيالي همّي وأنا اللي فـيّ كافينـي
........علمّهم الديـن تفسيـره ومنهاجـه

قريت ست ابيات

وما قدرت اكمل الباقي

الله يرحم ضعفنا
الله يعطيك العافية

يجب الايمان بقضاء الله وقدره وأن هذا الابن لا يلام ولم يكن متعمدا قتل أمه ولكن ذلك قدر ومكتوب وهو قد يكون بارا بها ويوصلها الى مكان ما ,, وقد يكون غير متسبب في ذلك الحادث ....

طبعا كلامي هذا اسنتنجته من ابيات القصيده اللتي تحمل في أحشاءها اروع معاني العاطفه وقمة الألم ولكن فيها نوع من الامتعاض ونسأل الله له الصبر ولأمه الرحمه وأن لايبتلينا بمثل ما ابتلي به ,,

القصيده رائعه ومن قلب يتألم ومن مشاعر جيّاشه فاضت بكل معاني الألم ,,,