( بدروز لبنان) .. يومك مانت لبناني

لوبي ومقهى وطرق العولمة ثاني
وفي المطعم الطاولة يقلون محجوزة

والمترف اللي جعوده فوق الأمتاني
ان تبت من فستقه ماتبت من لوزه

والعاذل اللي علشانه تبلاني
ان قال جوزه حلفت اني فلا اجوزه

يالله يارب تاقا زلّة لساني ..
وتاقاني من الوهن والقهر والعوزه

ويالله لا احوجتني لا كوز منّاني
اموت ظامي ولا ادنّق على كوزه

كم ليلةٍ قمت نص الليل جوعاني
وقشّرت موزه .. ولاني بآكل الموزه!

امسي على ضيقتي والغبن يملاني
واصبح تقول حربةٍ في الكبد مغروزه

يالقاضي اللي يحرّم كل الاغاني
لكن حلال ام كلثومه وفيروزه

ياقاضي الأذكياء لالا تغاباني
مسرح واراجوز .. والمسرح بأراجوزه

الى عدى الذيب يخرش راعي الضاني
ويفج نحرّ ( الثني) وعدوته فوزه

لكن ابأعطيك بيتٍ عذب الألحاني..
بيتٍ من الشعر يسوى الفين ارجوزة

يحشم عدوٍّ بوجهي جاء ولاقاني ..
عن صاحبٍ كلّما اقفي.. مدّ لي بوزة

( بدروز لبنان) يومك مانت لبناني ..
وش دخّلك بس .. في لبنان ودروزه ؟

لاتحسب المرجلة بالبشت يافلاني ..
الله كم قرم.. يلبس جنز وبلوزه

خذها نصيحة وحشّم لحية العاني ..
والله ماينفعك .. قارون وكنوزه

تالية بالقبر وحده بين لحداني
مهو بمآخذ.. ملايينه ولا بنوزه

وان كان وان كان جوز الهند عناّني
وش لي ووش للعنا .. والهند له جوزه

حنّا الحميا وحنّا مزبن الجاني
نفزع وفي سلمنا الفزعات مكنوزة

والغمر فينا يجيب القاصي الداني
اليا برز يفخر بناخية ببروزه

وقدامنا لا تنومس لاش وهداني
والله لنشرب دماهم شرب كازوزه

الحق لابد ما نظهره ويباني
ونحجّم ونكوي اللي لاذع فيوزه

والا انت ..
لا هنت .. ياراكب الرنج البريطاني
اللي ليا دق سلفه شبّت اقزوزه

وصل علومي لشيخ الدان ياداني ..
وقله ترى السالفة.. خبزة ومخبوزة

وبكره يعلّمه عن نجران .. نجراني
وبيارق فوق راس المجد مركوزة

الشاعر..محمد الدحيمي

اطلالة مميزة ولوحة من الحرف المنير مطلة
براعة اختيار وكلمات محلقة بتلاعب الالفاظ كـــ الاطيار

تحياتي

الف شكر للمرور الغالي الله يعطيك العافية

قصيده أغتسلت بـ عطر الجمال
شكراً لصاحب الحرف الشاعر الكبير محمد الدحيمي
زيزفون انتقائك فاح عبيره أبداع..تقديري

اسعد ني تشريفكم الغالي الله يعطيكم العافية