مواقف اختبارات ارجو المشاركة

السلام عليكم ورحمة الله

تمر بنا في فترة الاختبارات مواقف منها الطريف
ومنها الغريب , ومنها عبر نعتبر بها
هذه الصفحة لمثل هذه المواقف ولمن شهدها

سواء معلم او طالب
او معلمة او طالبة

سأبدأ ان شاء الله بما وقفت عليه
وان وجدت تفاعل أكملت

بسم الله الرحمن الرحيم

أحد الايام كنت ملاحظة على قاعة اختبارلثالث علمي
كانت الطالبات يراجعن من أوراق قبل دخول القاعة
وحين بدأ وقت الأختبار تركن الأوراق في الممر
وبعد مرور تقريبا عشر دقائق
جاءت رياح عصفت بالأوراق في الممر ودخلت احدى الاوراق
الى القاعة واستوت على رجل احدى الطالبات
فيها كل مالذ وطاب من جواب
الطالبة لا شعوريا رفعت يديها الى الأعلى , واغمضت عينيها
وبرأت نفسها من المسئولية تماما
الله يوفقها محل ما وجهت وبنات المسلمين
اخذتها منها بهدوء وشكرتها على أمانتها

موضوع جميل وفي وقته ..
كثيرة المواقف ومن الصعب ومنها الفكاهي ..
وقت كنت طالب بالثانوية ويشهد الله أني لم أعتاد الغش ولم أجربه من قبل ولكن كأنها حالة إثبات
إني هذاك اللي يقدر يغش ويعدي التفتيش وكأني جبت راس غليص ..
المهم قدرت أعدي ومشت الأمور تمام ودخلت للقاعة وخرجت وبرشام الغش محله قسم بالله ما طلع
أولاً فمكانه ما يطلعه إبرة - بالمثلث اللي تحت زراير الثوب -
وثانياً ماني في حاجته وإخراجه يحتاج إلى معلم خياطة
موقف ثاني بعد أن أصبحت معلماً وكنا نصحح وجاءت فترة الغداء وكان كل أهل تخصص يصححون بقاعة معيّنة
المهم رحنا للغداء بمكان ثاني وتركنا كل الأوراق وجاء واحد وأخذ مجموعة من اللي صححناها وحطها
بمكان ما ندري عنه ومشت الأمور وأنتيهنا وجمعنا اوراقنا ورحنا نسلمها للكنترول إلاّ حدود 60 ورقة غير موجودة
وهاتك يا ربشة وجنان وبالأخير أكتشفنا الوضع وكان موقف صعب ومزعج وعدا بسلام ..
تقديري ..

ايه يالاختبارات احلى ايام كانت ايام الاختبارات

كنت بالكلية الجوية عام 1429 و كنت متعود اطير مع المدرب الكندي
اطقطق عليه و يطقطق علي و ناخذ الطلعة التدريبيه ضحك على تعليم

المهم و تجي رحلة اسمها check mission

يعني اختبار يا تنجح و لا تطير رحلة تجربة ثم اقين رحلة اختبار

انا على نياتي و اطالع الجدول الا بيطير معي الرحلة عميد طيار

معاد يمديك تقول اونفيت طيران ( عذر طبي )

خلاص الرحلة فيك فيك ما عنك و عنها
و نطلع الرحلة جميع تشييكات الطيارة نسيتها
و قامت ارجيلي لها نفضه و ركبي تصافق

ما بعد استوعبت ان قايد الجناح العميد بيطير معي
و الله لو كان المدرب الي طاير معي لابدع في الرحلة بس العميد
ما قدرت اسوي شي جبت العيد

المهم fail كبر راسي يمشي مليون

و كلها من الرهبه و الخوف

فنصيحتي للطلاب و الي بيدخل امتحان لا تخاف من المادة توكل على الله و خلك واثق من نفسك


و المواقف تطول سواء بالكلية او بالثانوية و شكرا لك الازدية و نترك المجال لغيرنا

موضوع جميل جدآ وذكريات ومواقف لاتنسى ..
اولا:موقف لي كطالبه كنت دافوره وكل حرف اسمعه اكتبه على كتبي
وفيه جارتنا الله يذكرها بالخير متزوجه وتدرس معي منازل
قبل الاختبار بأسبوع طلبتني كتاب الرياضيات عشان تصوره
لانه محلول صح على قولتها ..واعطيتها وأنتظرت ترده يومين
الا لاحس ولاخبر ..؟؟!! أتصلت عليها لقيتها سافرت سراة عبيده
حالة وفاة والكتاب معها تذاكر فيه دوروني وقتها بغيت اموت خوف
من الامتحان ومن أهلي وزعل من الموقف واضطريت اصور كتاب زميلتي
واعتمدت على الله ثم فهمي لكن والله ياني حقدت عليها
وهبت عليها غبره قلت الله يلحقك من سار الانعم ..
ثانيآ وانا معلمه : أنا ادرس أجانب غير سعوديات وكتبت الاسئله بالعربي
وحطيتها على مكتبي واثاري وحده تفت عربي ومادريت ..
لقطت مافي الورقه وانا قلت بس مابتفهم شئ واجي وقت التصحيح
الا الحل 50/50 وكلهم نفس الاجابه الله يصوعهم ..
طيحوني بموقف محرج وحلفت أن أكتبها باللجه الجنوبيه وقابلوني ان فهموا ..

ههههههههههههههههههه الله يسعدكم ع الموضوع ...جد جد محتاجين حاجه تونسنا..
انا افتكر وانا بثاني ابتدائي اختبارات نهائيه ..اختبرت الفتره الاولى ورحت للبيت مشي ..وبعد نص ساعه تقريبآ الا الخاله الله يذكرها بالخير تدق الجرس تدور علي اتاري فيه اختبار فتره ثانيه علوم ..وانا اصلآ ناسيه ولاذاكرت ابد ..بس الحمد لله كان سهل وعدت على خير...الله يذكرهم بالخير معلماتنا كان عندهم امانه ..يحفظونا المنهج ايام المراجعات ..وايام الاختبارات ماكنا نذاكر بالبيت الا اشياء بسيطه او امي تعمل لنا اختبار للمنهج كله..
ولي عوووده لوتذكرت مواقف اخرى..

واياك يالغلا
وذكرتيني ببنت أختي شرت لها امها جكيت فرو ايام البرد ولبسته تكشخ فيه في المدرسه ومن الفرحه خلت الشنطه في البيت هههههههههههههههههههههههههه

هههههههه يسعدها ياناس....


انا افتكر بصف اول احاول اشتري بالفسحه وانتهت وانا انطط مالحقت اشتري ..
ويوم دق الجرس ..شفت البنات يرمون العلب وباقي الساندويشات وانا مابيدي الا خمسه ريال ...قمت رميتهابالزباله اكرمكم الله ورحت للطابور ههههه غباء

الله يسعدكم على هذا التفاعل

موقف آخر
في سنة من السنوات كان عندنا طالبة ابتليت بالسرقة
وكانت تتأخر شوية حتى يدخلون الطالبات القاعات
وتسرق من شنطهم
يوم كنت اتابع دخول الطالبات الى القاعات كان فيه ثلاث
حطو شنطهم جنب بعض ومشوا مع بعض
وحدة منهم رجعت الى شنطتها وكانت في الوسط
ومسحت عليها بطريقة غريبة
قلت في نفسي تشعوذ ذي والا ايش؟!
المهم بعد انتهاء الاختبار كل وحدة تصيح شنطتي انسرقت
الا اللي مسحت على شنطتها سلمت
قلت تعالي وش سويتي لشنطتك قالت قلت
استودعتك من لا تضيع ودائعه
سبحان الله وسلمت شنطتها
وبعدين عرفنا الطالبة اللي تسرق

برضه موقف آخر ولكن لزميل وليس لي والله الشاهد ..
بس الفارق إن الإختبار إختبار فترة وليس نهائي فيعلمني ويقول جيت للمدرسة وكلي نوم
وعندي إختبار وما أقدر حتى أفتح عيوني المهم بدا الإختبار ويقول جلس على الكرسي وحط النظارة
السوادء قال ونمت وكل شوي أقول بس يا ولد وخل عينك في ورقتك
يقول والله ما أدري ولا أحس بشئ بس لحظات أفز وأقول هالكلمتين ..
المهم يقول كانت الحصة الثالثة وأنتهت وطلعوا الطلاب للفسحة ولقي كل الأوراق مجمعة
على الطاولة وهو باقي يقول بس يا ولد

هههههههههههههههههههههههههههههههههههههههههههههههههه
بسم الله عليه راعي علم ..

تقول لي وحده من الجماعه اكمل ولدي في ماده وودنا نصيف
قالت وسافرنا للديره ..المهم يوم قرب موعد الاختبار وكان وقت زواج
حماها ضحى زوجها بالزواج وجاء بالولد يختبر في الرياض المهم جو قبل الاختبار بيوم وبه تعب خلف ..دقوا بها نومة وصحيوا العصر هههههههههههههههههههههههههههه والاختبار دلى الوادي ولا حضروا العرس
المهم تقول واكلم هاه وش صار في الاختبار قال الاب يصرفها ان شاء الله ناجح قالت وكملنا الصيفيه والسر محفوظ بين الولد وابوه ويوم رجعنا الا وصدمة خبر اعادته للسنه وعدت الامور والمشكى لله وقعد السر محفوظ ويوم تخرج الولد الا الام مسكينه تقول لو انك نجحت هذيك السنه كان لك سنه من يوم تخرجت قال ومن قالك اني اختبرت وعلمها بالمفاجأه هههههههههههههههههه وانصدمت الضعيفه تحلف قعدت اسبوع زعلانه عليهم ..