من كثرة الخوف تتصور غير الحقيقة

في سنة من السنوات ذهبت انا واخواني رحلة ومقناص في وادي بعيد عن المنزل وفي اليوم الثاني قرروا ان يرجعون الى البيت وكان بعد العشاء الساعة الثامنة وكانت الساعة الثامنة وقتها تعتبر متأخرة ومن عباطتي وراسي اليابس رفضت اروح معهم ونمت في الظلام الدامس واستغرقت في النوم مايقارب ساعة وصحيت متذكر ان اهلي راحوا ولا بقي الا انا والذياب والدواب والجن وندمت ولكن معاد ينفع الندم وكنت نايم تحت سدر وغيرت موقعي بجنب حجر بحيث يكون الحجر من خلفي امان والنظر من امامي لاني متذكر كلمة ابوي يقول لاتناظر وراك فضحكت على نفسي ظهري في الحجر ونظري امام وكأني احس الحجر يتحرك وشعر الراس يقشعر من الخوف فقررت امشي ومشيت واتخيل يمشي وراي شي ولا ناظرت الف لفة كبيرة اضحك على نفسي بعد واشوف اي شجرة وحجر كأنه جسم فية يدين وراس فأذهب الية عشان اطمن نفسي فاذا بها شجرة او حجر عادي وين راحت الرجلين والراس مدري وامشي مع الوادي حتى وصلت عجمة مكان موية تقريبا الساعة الواحدة صباح فاذا به حركة عند الموية وعند اقبالي علية توجهت لي جلست واذا بها تشوتني ولاعاد قلت كلمة واحدة احاول اسمي توقف كل شي عندي وانتظر هول الليل يركب على ما قالوا وبعد قليل من الوقت حنت واذا بها ابل كانت تشرب من الموية والعجمة امامها مالها طريق الا من عندي تذكرت وقلت الحمدلله دامها ابل قررت اجلس حولها وتوجهت لها وهوبيت لها وجيت عندها كانها بشر معي اهم شي لقيت شي اعرفة وطال الليل ولقيت حجر اعرفة مجوف من تحت (صلة) وقلت بنام واللي يجي يجي تلمست اهم شي مافية ديبان ونمت وفجأة صحيت ونهضت ونسيت من الحجر انه نازل ودقيت راسي في الحجر باقوى ماعندي ودخت صرت اشوف الارض كلها تدور ومسكت راسي من الالم ونمت وصحيت عاد كم نمت مادري الظاهر انها 5 دقائق افكر اني نمت ساعة وقررت اذن الصبح وانا تحت الحجر واذنت جات البل على الصوت وسمعت عصفور الصبح اعرف صوتة الى غرد اصبح الصبح مافيها كلام تطمنت ورحت بعد الاذان العجمة ابي اغسل واتوضا سمعت حمير تشرب قلت في خاطري الا الحمير واخاف اتكرر شوتات الأبل قمت احذفها من بعيد وجيت مع الجبل وعثرت وانعفصت قدمي وزادت الطين بله وعيت الحمير ماتروح ابي اصوت عليها مادري ايش اقول صرت اقول ياحمار امش ابي اوضي قام واحد خبيث نهق واطرح رجلي قلت بس هذي جن وتيممت وصليت ورحت البيت قد نزل من وزني نصف وباقي راسي مخفوش من الحجر وصرت ما اخاف وامشي في الليالي ولا فكرت في شي وده انس وده جني بعد اللي جاني درس وفيه حاجات استحيت اذكرها في القصة وكنت شاعر رغم صغر سني وقتها
من الابيات
الوقت بيّن في صفاحي غلبة
من جور ناس يدبلون الكبد
وكثر ما جاني مع بو صلبة
وشعبة النية وحرف الوبد
===================بو صلبة -النية -حرف الوبد -شعاب في هذا الوادي
هذة من بعض المواقف اللي مريت بها والخافي اعظم

واللهـ قصهـ على مستوى..
ننتظر الجديد
لاهنت يالرادار

لاهنت الرادار
ننتظر جديدك