الإهداءات |
|
|
|||||||
| التسجيل | التعليمـــات | التقويم | مشاركات اليوم | البحث |
| عطر الكلمات (خاص بالمنقول) |
 |
|
|
أدوات الموضوع | انواع عرض الموضوع |
|
الإهداءات |
|
|
|||||||
| التسجيل | التعليمـــات | التقويم | مشاركات اليوم | البحث |
| عطر الكلمات (خاص بالمنقول) |
|
|
|
أدوات الموضوع | انواع عرض الموضوع |
|
|
|
#1
11-18-2013, 12:59 AM
|
|||||||||
|
|||||||||
توق ..من روائع البدر
كل الاماني توق
الحب ما تدري لحم و عظم و عروق او غير هالمخلوق بعد الغروب يظهر من الرماد يظهر خده قمر اشقر جيده فجر عاجي على المتن ينثر مثل الفحم داجي لا تلمسه برفوق هذا الجسد منحوت من شمعتين و ظل و صدقني لا تسآل من يا ترى العاشق او يا ترى المعشوق كل الليالي قوت و كل الاماني توق * * * ما يروح الحب كل ما قلت أدهر القلب من نبت الجروح طاحت حروفٍ بصدري مثل وبل المطر و انبتت عقب المحل عشب وأزهارٍ تفوح بعطر من فارقتها عمر .. يفداها العمر ما يروح الحب لو كان من يعشق يروح كل ما زاد فـ غيابه عن الغالي حضر تكتم الخدان مني ملامح او تبوح ما تغيّر سقم حالي من هموم وسهر * * * هذا الزمان غبار شمسٍ عليها شمس و جمره على جمره ارضٍ مثل جره مليانةٍ رمل و قلوب مصفره تكسرها كل خطوه تكسرها كل لفته هذا الزمان غبار به لحظتين امطار موت العطش مرات اما الغرق..مره * * * القمر ظلك يذكرني القمر ظلّك .. عجب ياللي ظلالك نور انا اللي ماعرفت الليل , لولا عتمة أهدابك حبستك في السما شمس وعلى وجه السحاب طيور ونخيلٍ باسقٍ يشرب رضاك ويعطش اعتابك وجلست اناظرك مارفّ لي جفن تقل مسحور اقول ان الجمال انتي .. وكل العشق بأسبابك هقيت اني ملكتك ما دريت ان الأماني غرور و انك في يدي لين انتحى بي الوقت و اقفا بك سقى الله يوم كان أكبر همومك خاطري المكسور وكنت الضي في عينك وكنت السقم في ثيابك و سقى الله يوم كنتي الارض انهار و شجر و قصور ديارٍ نورها من طاقتك , و احلامها بابك عيوني !! يا شقى عيوني من الجذب الموات البور اراضي ما بها الا ما ذوى و انهد فغيابك احبك .. كان لي قلبٍ يجض من الجفا مقهور و صار اليوم يفرح , لو لقى به عذر يشقى بك * * * شرايد نوم على الوساده شرايد نوم من ما ترك خلي الجافي لعل تالي سهرك اليوم يا عين و اللي مضى كافي هجرت هم و طويت سقوم و دخلت في المخدع الدافي و ساعة غفى جفني المحروم و رميت حملي على اكتافي حلمت باللي هواه حلوم يصب جمرٍ على اطرافي و انا احترق يالله المقسوم و اطفي النار بلحافي يا زين للعاشقين سلوم و غاديك تحكم بالانصافي هو ينعدل لا شقى مظلوم او يشكي السقم متعافي ما شفت جرحٍ عليه هدوم؟ هذا انا البيٌن الخافي * * * الهجن الهجن تضرب خدود البيد بـ خفوفها لين تدميها والطلح له فـ المضامي جيد لامن فهقناه يلويها وللجن بين العواسج عيد ونيران في الليل تضويها ارضٍ تلاشى و ارض تسيد طال السفر منها فيها * * * لو ما رقيتك يا جبل انا لو مارقيتك ياجبل ضاقت بي انفاسي اشرف فيك وارد النفس وافرج الضيقه بعد ماطالت الغربه رجعت لـ غربة احساسي انا مالي وطن ما دام جمع الشمل تفريقه حبيبي مثل سيفٍ لا تركني ولا قطع راسي عروقي حار فيها الدم ليت الصارم يريقه ذبحني قبل يذبحني غرام اللين القاسي وصاله صعب لا شك التجافي كيف باطيقه * * * لو حبيبي حبيبي من سألني حبيبي عن حبيبي لمحت في ابتسامه شمات و في عيونه فضول اكتم الهم لا افضح لوعتي لو شرحت من غدر به حبيبه يا ترى وش يقول يا عذولي جرحني صاحبي و انجرحت و لو حبيبي حبيبي ، ما جرحني عذول * * * دخل العيون ذي سربةٍ من خيل ولا فؤادي بين الحنايا جض من سربةالخيل هذا هدب والا غرستي الايادي بالصدر..و اظهرتي مرايا و قنديل دخل العيون اللي تسلّ الهنادي لا تقتليني قبل لا اناظرك حيل هذي عيونٍ مالها الرشد هادي مغرورةٍ ما همّها العدل والميل * * * جيتك و انا عطشان يا بنت جيتك و انا عطشان بقول بالله تسقيني مديت كفي و انا شفقان لين التقت عينك بعيني شربت في نظرتك غدران لا يا بعد باقي سنيني * * * عللتهم يا مكدس الليل في جفوني الا السّحر من هزيع الليل والله لو شفتها عيوني نيران سمر فـ مدارج سيل البارحه يوم مروني اهل النضا من رجال عقيل قالوا القمر قلت فـ اردوني أما الجدي في الهدب وسهيل عللتهم لين سهروني واسقيتهم مع حديثي هيل و ركبوا على الهجن خلوني وسط العتم كني القنديل * * * اتداوا ياقلبي اتداوا يا قلبي من طعونك القى في غضبك الدوا كثر ما يدميك يا قلبي الحبيب اللي يخونك كثر ما يشفيك من جرح الهوى نصف شمسي غابت في ثياب الارامل و نصفه الباقي رحل و هذا عمري عشق ذابل و عرسي حنا من وهم و كحل ودي اشقى فيك يا حبي لين يحرقني جنونك بس لو عندي امل اتداوا بك يا قلبي من طعونك غصب و يرضيني الزعل * * * السجن الناس..وش لي بغير الناس عزي لمن يقعد لحاله فـ السجن من دونه الحراس ماله صديقٍ سوى ظلاله يا طير سلم على فراس اللي ورا الحبس و اقفاله قله فداه الكدر و الياس و يفداه عراك و رجاله * * * ياللي بخدك تكاشف نوض برقٍ شعق بالسما نوره لولا النفل ما عشقت الروض ولا همني العشب و زهوره * * * 
مُريحة فكرة أن أستودع الله شتات أمري وأمضي مبتسماً .. 
|
|
11-18-2013, 12:59 AM
|
#2 | |
 
|
من حوارات " توق" يا هالسحاب الراجع من السنين القديمه من اربعين عامٍ مضت مدري يحمل سحابك ديمه او يحمل الموت الله العالم يغيب سالم..و يولد سالم قلي يالسحاب الظالم مريت في صيف من اربعين عام و نيف و اخذت ابوي اخذته يوم سيلك تحدر مثل الجبال مع الوادي و اخذت معه كم ثوبي الشاش يعلم الله قضبت دموعي بالايادي لكن ماش انطلق مني غصب انطلق و انشق كمي معه و رجعت اصيح و محد التفت يمي كلٍ يبي ينجى..يبي ينحاش و ما دريت وش اتعذر لأمي وش اقول!! ما خذت ذيك السيول غير ابوي مطر في غير الفصول على غير الاراضي يا ترى لمن جيت هالمره له .. او لغيره؟ يا هالسحاب القادم من هاك الديرة من ذيك السنين الكثيرة وش اللي جابك الله العالم حذاري يا سالم..حذاري يا سالم * * * المطر مات يا سالم عُود لا تيتم المولود الريح تلفظ انفاسها ما بقى الا السيل يسري مع الليل عُود عُود يا سالم المطر مات لا تموت يالمقرود يا سالم عُود ما غرق من الناس احد وين فازع يا رب ما للمنايا دافع الا الدعا يا رب يالله تحميه وين هو رايح السيل مات عُود يا سالم عُود يا ترى هذي قطعه من ردني و كمي اللي غرق مع ابوي في هاك السنين زدني يا سيل زدني شي من ابوي خاتمه الفضه عصاه او سبحته كل هالسنين و انت تحمل جثته و تدور و تدور ما للسيول بحور تصب فيها ما للميتين قبور ترتاح فيها رد لي عظامه اواريها الثرى يا ترى هذي قطعه من ردني؟ زدني يا سيل زدني * * * تعالي .. تعالي و كثري غياب للفراق اسباب ما طاح مطر في غير مواسمه .. الا عذاب * * * ليت هالنهار ما طلع ليته اخر نهار على الارض او على هذي الديار والا علي انا بس.. يا ليت هالنهار ما طلع يا ربي نسيته له ليلتين ما رضع سبحان محيه كن احد يطعمه و يسقيه وجوده الم .. و فراقه وجع يا كرهي له و يا قلبي له و يا كثر نسياني له * * * متى ضاقت تذكرنا الحضن الأول و تداوينا بالجرح الأول * * * عليك من السحاب خطر و فيك من الغريق اشباه * * * كان اكبر من كل المواليد و من كل الصغار جفونه ثقال و عيونه سادره و كبار شديد و قوي و جبار و على شفته ضي ابتسامه ساحره من شافها يحتار فيه الحنان كله كيف اوصفه سدران ما يشبهه انسان * * * توق : جينا نبارك لك بالمولود فاطمة : تباركونلي بالمولود واللي مات ماتعزون فيه توق : انتي لك الغايب وحنا لنا الموجود فاطمه: طيب وين راح سالم من اللي حفر القبر .. من فصّل الاكفان توق : ليه ماتسألي الفرسان اللي خطفوه الفجر وخذوه للنسيان فاطمة : من اي السنين انتي .. من اي بلاد؟ توق : انا من سنين الما ومملكة الرماد جيت اهنيك بزوجي المولود فاطمة : صبيه مثلك تتزوج طفل صغير ؟ ولله مصيبه توق : الطفل يكبر وبنلتقي بالسنين القريبه * * * اسامحه بعد كل اللي حصل بعد ما تركني في ليلة عرسي منه و رحل ما بعد هالجرح جرح .. ولا هالزعل زعل * * * قلي يا غزالي اسامحه؟ اسامح فراس ؟ او اسامح السيل و الغرق؟ او اسامحك؟ وش ذنبك يا غزالي انت .. غزال امك يا ويلي احتاج اضمك لكن زنودي ترفضك وشلون احبك؟ اجلس..اوقف..اركض..اغمض عيوني..افل شعري او اجمعه وشلون احبك؟ وشلون كرهك امنعه؟ منت شين لا وربي بس بي خوف و هم و حزن في قلبي منك و عليك ليه ما تناظرني ليه كارهني او عيونك تناظر في داخلك يا ترى وش في داخلك والله مدري انا استاهلك لي عذاب او يا ترى ما استاهلك ليالي و تكبر يا غزالي يا غزال امك * * * الله يهديك يا عيوني قلتلك لا تناظرينها ادفني الشوف فـ ابوابها و فـ طينها فـ البساط فـ السراج و اتركي اللامع الوهاج فعيونها كانت حرايق نايمه و صحت ابواب مغلّقه و تفتحت على السنين اللي مضت هاك السنين يا زينها ما قلتلك يا عيوني لا .. لا تناظرينها * * * يا مساء الوله و الجروح الاوله و العشق اللي ما يندري اخره من اوله * * * يخيل لي أن الحياة أحياناً تصبح مثل هذا البحر ومثل تلك السماء لا يفصل بينهما أفق تصبح كلها ماء أو كلها سماء * * * مرت شهور و شهور من الغياب لابد للغايب يرجع و النجوم تطلع بعد اثنين ثلاث .. اربع ايه يا نجر لو ان ربي جملك بشوية صبر سبحان من يعلم الغيب لا شك قلب العبد دليله كلها يومين و ليله و ام سالم ترجع و الطفل يرجع من رحم العواصف يطلع من قلب العواطف يطلع ظفر كله قديم الا لياليه كله جديد الا شرايد من حزن و قهر احذر تجي على يسراه ولا تزعله .. زعله كايد هو البحور الى ارتطم هو الغدير الى ابتسم في كفه اليمنى رطب و في كفه اليسرى جمر * * * سبحان مقلب القلوب و الابصار لا الليل غدا ليل ولا النهار نهار ما خبرت السيل يجري في غير واديه ولا الزهر ينبت في غير اراضيه وش جاب هذي لهذي انا محتار * * * كافي هالعذاب الله العالم وش جرى عراك كذاب لابد لفراس عذر و لسفره اسباب لكن مهما كانت الاسباب اللي صار صار العمر ولى و فراس راح كافي عاد تكفون يالاجواد خلاص ما عاد فيني صبر كافي هوان و عذاب و فقر فراس جاه اللي جاه خلاني و رحل و انا ما فيني انتظر كافي انتظار و صبر * * * هذاك راح و ما ودعني و هذا بيروح و ما ودعته فراس ضيعني و انا سدران ضيعته توه صغير ما اظن يتذكر او يتكدر وش دراه ان امه ما ودعته ما ضمته لصدرها الله العالم متى بشوفه بعد ما يكبر ودي اغمض اجفاني و افتحها و القى اللي صار ما صار هم و يتم عيال صغار و حبيب مثل الحلم كل ما صحيت ضيعته راح و ما ودعني و هذا بيروح و ما ودعته * * * سراب : سلام يا فراس سلام يا الناجي فراس : من انت يالغريب .. من اين جيت سراب : انا البشير .. حيّيت يا فراس حيّيت فراس : اقول يالغريب .. ماعندك ماء تسقيني سراب : لا معي بشارة .. ابشرك انك ناجي فراس : لا تبشرني و أنا العليل .. عطني علاجي * * * يا هلا بأميري يا توق الروح يا روح التوق اطلب و اتمنى تريد المن والسلوى او التمر الرطب تريد الماس و المرجان او تريد الذهب * * * ما للضعيف لسان وما للقوي عيون يا قرية العيدان في داخلك إنسان من يربطه يندم ومن يجلده ملعون * * * هذا حرف الاف اول الحروف و سيدها واقف مثل النخيل يناظر للغمام ما به ميل .. السقام في الميل و الالف حر .. مثل لسان النار مابه سقام و هذا حرف الباء ثابت قاع لكن ماهو غميق مثل نقع الصخر يحبس ماي المطر و هذا حرف الثاء ارض بثلاث نجوم و مابينها غيوم بتلاحق غيوم * * * كم سنه مرت على الفرقى و على نية النسيان ركبت ذلولي و ظهرت من العيدان كن الريح شوك يغرس فـ جسدي و الشمس لهب يسعر بقلبي مهموم و غضبان افكر بفاطمه و بالعرس و فـ النصيب اتجهت جنوب لجبل منيف و الفكر غايب يوم مشيت حول الساعه و التفت لا والله لاحقني سبع ركايب و فرسان عرفت انهم العسكر العسكر جوك يافلان فكرت في ثلاث امور اما اني اذبحهم و هذا والله ما كان علي كايد جبل منيف اشوفه و اعرفه و بندقي ما تخطي و الفشق واجد و فكرت في الهرب و هذا بعد في يدي فرسي اصيا و عديده و ركابهم مهجنات و هزال لكن انا مافي بطني ولا فظهري ما سرقت احد ما ذبحت احد عندي شهود رجال ناوشتهم و ناوشوني و بعدها لقيت الافضل اني اسلم نفسي و سلمت نفسي للعسكر و صار اللي صار للو كنت اعلم اني بقضي كل هالسنين بالسجن ما كنت والله قضبتهم لحيتي اقدار..اقدار * * * توق: شالوا الحرير والعطر..وكحل عيوني ورحلوا يا سودة..في ام الرماد خلوني خلوا العروس..والعرس ما تم..وصار الفرح مأتم واللي عشقت اترابهم ما كنهم حبوني سوده: سدران أختار..هاذي هي الأقدار يا توق .. خليه لقوت..خليه..بكيفه يعيش يموت لا تحرقين قلبك في ناره..خلاص..اللي صار صار..وسدران أختار * * * قوت: قلي .. يسرك اني ما اشوفك؟ سدران: يسرني اكثر لو تشوفيني قوت: من ولدت و انا عميا .. و ما لقيت منهو يشرحلي وشهو الشوف سدران: الشوف مثل يد ثالثه للانسان تلمس و تمييز اللي ما تقدر تميزه الايدين مثل الاشكال و الالوان و النور و الظلام قوت: وانت وين يدك الثالثه الحين؟ ما دام الشوف يد اكيد له اصابع و اظافر ما عليك يا سدران ناظرني زين و قلي .. ليه تبي تتزوجني سدران: الصحيح امي هي اللي تبيني اتزوج قوت: و ما لقت بنيه تتزوجك الا عميا مثلي سدران: يجوز .. لكن ما كل من يبصر يشوف الجمال و القبح نتعلمه اكثر من اننا نشوفه قوت: اجل وش نفع البصر سدران: نفعه اننا نشوف اللي نتعلمه * * * فيني قهر فيني غضب مدري من توق من قوت من حظي التعبان ما عاد اطيق السكوت و اللي في يدي اغضب على سدران و اجرحه تجريح أنا وش صابني..وش صابني صارت عيوني جمر وقلبي عجاج وريح * * * قوت : صير مرايتي .. اوصف لي كحل عيني وزينة شعري .. خليني اشوف نفسي سدران : و شلون اوصفك وانتي أجمل منك قوت : ما الله كتب اني اشوفك .. اقرب عشان المسك بيدي قلي وش اسوي عشان اسعدك سدران : حبيني كثر ما تقدرين ولو ما قدرتي خليني أحبك كثر ما اقدر أنا |
|
مُريحة فكرة أن أستودع الله شتات أمري وأمضي مبتسماً ..
|
|
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| من روائع المعاني | حنايا الروح | المواضيع العامة والإخبارية | 6 | 01-16-2010 03:10 PM |
| رائعه من روائع البدر | سهرررررررررران | عطر الكلمات | 1 | 07-29-2009 03:45 PM |
| رائعه من روائع البدر | سهرررررررررران | عطر الكلمات | 2 | 04-01-2009 01:19 PM |
| من روائع بن جدلان | اسرارمدفونه | عطر الكلمات | 3 | 04-18-2006 10:07 AM |
| من روائع بن عزيز 3 | ابن قصاد | الشعر الجنوبي للطرح الذاتي | 0 | 05-06-2003 01:47 PM |
العرض المتطور