البنات يتحملون الالام والأوجاع من أجل الجمااال !!! وشوفو الدليل

بدون حقد وبدون نظرات هيك ولا هيك ... أقروا وأنتوا ساكتين ... يابناااااااات ..

التعب الوجع الالام مو مهم اهم شي تطلعين أحلى !!! عارف .. وهذا الدليل!!!!!


الكعب اللي يلبسونه الحريم وكما يسمونه (( الشوكه ))
هذا الكعب أتحدى رجال يمشي فيه متر واحد الوحده تلبسه وتروح مناسبه ولين رجعت وفصخته تترحم تقعد تتشكى وآآآآآآآي يا ظهري ومقدر أحركه وحااااااله (( طيب وش اللي حادك يوم تلبسينه))؟؟ أنا أقولكم ليش عشان تطلع طويله ورزه
باختصااااااااار عشان تطلع أحلى...!!!؟؟

يروى أنه إحداهم تبغى تحضر مناسبه لبست وتكشخت وما لقت جزمه (( الله يكرمكم )) تناسب الفستان وش تسوي لاااااااااااااااااااازم تلبس شي يناسب تروح تحوس عند خواتها تلقى وحده مناسبه تقيسها تطلع ضيقه وعناااااااااااااد إلا بتدخلها واخيرا قدرت تحشرها برجلها وراحت المناسبه والمسكينه رجعت ورجلينها وارمه ومحمره ((طيب لييييش)) كل هذا عشان الكشخه عشان تطلع اجمل وأحلى..!؟؟

بعض البنات تلتهب أذانيهم من (( الحلق )) واذا طلعوا مكان لازم يلبسون حلق ولازم نفس لون اللبس ومايمدي الوحدة ترجع إلا على طول تفصخه هذا إن ما فصخته بالسياره بعدين تروح تغسل مكانه بماء بارد وتحط كريم وحاله
كل هذا عشان تطلع أحلى..!؟؟

وفيه حلق نازل قبل فتره يكون طويل وكبير ما تتحمله الإذن البشريه يعني يالله إذنين فيل عشان تناسب حجمه >>>> مع احترامي بس والله اني استغرب من اللي يلبسونها خطر تقطع أذانيهم بس وش يسون يتحملونها عشان الموضة عشان يطلعون أحلى..!؟؟

العدسات الملونة ما تناسب عيون الجميع و بعضهم يلبسونها وعيونهم تحمر وتدمع وتوجعها بس الضعيفه مقاومه ومتحمله عشان تطلع أحلى...!!؟؟

وإلا التسريحات بالعروس ((وما أدراك مالتسريحات))حدث ولا حرج يمكن البعض ماقد شاف درازن التوك والبنسات المدعسه في هالتسريحات يعني لو الوحده تجيها خبطه على راسها يمكن بيتخرم راسها من البلاوي اللي تحت التسريحه وبعض التسريحات ثقيله ومليانه اكسسوار وبعضها يوجع الراس ويكون مشدوووووود طيب لييييييييييش مستحملين العذاب عشان تطلع أحلى...؟؟؟

والبعض ما يتحمل الظل أوالكحل لأن عينه حساسه ويحطونه وعيونهم توجعهم وترجع البنت وأنواع القطرات وغسول العين ((من البلاوي اللي حطتها)) طيب ليش تحطها وعينها ما تتحمل...!!؟؟ طبعا ماتروح بدون ما تكمل المكياج حتى لوعيونها تنحول أهم شي الكشخه عشان تطلع أحلى..!!؟؟

بعض الحريم تبي تلبس فستان ضيييييييييييق والكرشه ماتساعد ابد تروح تلبس مشد ولا يخفى على الجميع ما يسببه ذلك المشد من آلام..يعني اللي يلبسونه يترحمون حتى ما يعرفون ياخذون نفس منه ويمكن ما يتعشون حدهم الشاهي بس مافي أمل الفستان بينشق كل هذا عشان تطلع أحلى....؟؟!

والبعض نفس الشي تنانيرهم ضيقه مررررررررررررررره السحاب شوي و بينقطع تلقاهم اذا جو يتعشون فكو السحاب عشان تدخل اللقمه وليه ...!!؟؟ عشان تطلع أكشخ وأحلى..!!؟

وإلا الوحده اذا طولت هالأظافير تحسبونها مرتاحه فيها تكذب عليكم لو تقول إنها مرتاحه وأنا اعني بتطويل الاظافر اللي مو صاحي يعني انسب شي سنتي متر واحد هذا اكثر شي وبعده تقررررررف وتتحمل البنت عشان المناكير والموضة والحركااااااات عشان تواجه وتطلع أحلى...!!؟؟

لا وبعد أزيدكم من الشعر بيت اذا جت الوحده ترووح العرس تقول أسلحة دمار شامل على راسها طيب ليش تتحمل ها لأسلحه عشان تطلع احلى..؟؟


بالاخير جمال الروح وهو الأهم ( الجمال الداخلي) ويبقى الشكل الخارجي مكمل بس ياليت ماتقسون عليه ..

موضوع رائع

وكل مافيه صحيح وشهدناه

التجمل مطلوب لكن ليس الى حد الاذية

بارك الله فيك


لو سمحت لي انقله الى منتدى نسائي بعد اذنك

أمال خير ..

شكراً لحضورك .. والموضوع أنا ناقله لكم بدون إذن من كاتبه هناك في أحد المواقع .. هلي يلزم إستئذانه ؟
أما هنا في بني عمرو فلك ما طلبتي وعساك ع القوه ...

أرق التحايا

يووووه يوووه عاد مولهالدرجه وربي جناااان
للمعلوميه في رجال يتحملووون اكثر من البنات عشان يطلعون حلوووين خخخخخخخخ
الله يستر علينا بس

غلا........ي

يعطيك العافية

طيب ليش تبغى بنت فلان وزجة فلان وفلانه تقول عنها اذا ما كشخت انها احسن منها

لا ويجلسون يحشون فيها شهرين بعد المناسبة هي واهلها او زوجها ما قدروا يجيبوا

ولا قدر يجيب ... اخوي غلا ي وللاسف الشديد ان معظم المناسبات صار سبب حضورها

الاستعراض فقط بما لديهن من كل جديد .. ولكن اقول للبنت احفظي نفسك من العين فهي

حق وكثيرات انصابوا بها في مثل هذه المناسبات وكذلك الزوجه .. وللزوجة ايضا اليس

زوجك احق بأن تتجملي له اكثر من تجملك لأي مناسبه ,,,

حفظ الله الجميع من كل مكروه

بالصراحه أحلى على mbc1 ..
والصراحه راحه ..
بس لو ما تتجمل المرأة والله تقعد في البيت مدى الحياه (عانس)..
لأنه بصراحه ليس دفاعاً عن النساء لكن الرجال هذه الأيام لا يريد إلا الجمال ..
ولايبحث عن الدين والخلق .. فالله المستعان ..
شكراً لك أخي غلا....ي على الموضوع ..

فعلا بعض البنات حاليا يبالغون في الزينه و احيانا في اماكن ماتحتاج زينه مثل الجامعه والله العظيم اني اشوف بنات في الجامعه صارت اشكالهم مقززه من كثر ما حطو من زينه نمص كامل للحاجب والله ما ابالغ ويرجعون يرسمون الحاجب من جديد بالكحل و يسوون التاتوو و يحطون مكياج مية طبقه والله هذا اللي اشوفه بالجامعه الا من رحم ربي لدرجة ان فيه بنت الله يستر علينا و عليها كانت تحط الكريم الملمع حق العرايس (اللي يطلع العروسه تبرق ) و الا فيه وحده تلبس كعب بالجامعه و هي كل قاعه في طرف من الجامعه الله يهدي الجميع لما يحب و يرضا كلام كثير ودي اقوله بس ............. الله يعين

موضوع جيد ولو انه من نوع الحش فينا بس حقيقي
وازيدك من مشاهداتي
بعضهم تلبس عدسات ملونه وهي ماتشوف زين يعني محتاجه نظاره فتقعد طول الوقت وهي كنها عميا بس علشان تصير احلى

شفنا اشياء ينتقدها اي انسان لانه لاتصدر الا عن عقليات تعبانه
والا اش يجبر الوحده تحشر نفسها في فستان ضيق والا ثقيل والا تلبس كعب عالي وهي باليالله تمشي بدون كعب
عقليات واهواء ونفسيات اعتبرها مريضه وغير كذا المبالغه في اي شي تسيء للشخص ولا تجمله

ولا تقتصر على النساء لكنها تشمل حتى بعض الشباب اللي يهمه مظهره اكثر من راحته الشخصيه

غلا...ي

لكم الموضوع هذا ورح نبحث ونتقصى عن مايخصكم قريبا
دمت في خير

عينك سماي...

ما أعتقد باخذ جزمة صاحبي عشان أكشخ في عالمنا عيب أو مالها داعي بس أنتوا مايجلس في الدولاب شي .. هات هات ...

شكرا لمرورك

سد الوادي ...

تسلم على تداخلاك الرائع .. وكل كلامك صحيح ......
من جد عليهم حش مو بصاحي ..

أرق التحايا

الفارس الملغمق ..

أنت في وادي وحن في وادي .. ماقلنا ماتتجمل وتتزين بالعكس ..
لكن ما تورم أصابعها عشان تاخذ جزمة صديقتها من أجل حضور المناسبه وعشان تطلع كشخه إم تعود أه أه ...

أرق التحايا

نواره ...

شكراً على حضورك ..
وياليتها ع الجامعه وقصور الأفراح وحضور المناسبات .. جنس ناعم كلهم ..
لكن وصل التكشاخ حتى السوق أهداب عيونهم طايحه من ثقل مابها ...
الله يهديهم ويصلح حالهم ...

أرق التحايا

ذات الشان ..

حياك .. أما راعية العدسات ياليتك قلتي لها والله انك ترحمين الحصى ماتشوفين زين وفوق ذلك ما تشوفين الناس شي .... يمكن تستحي وتطلع النظاره ... ومسألة لنا ذا الموضوع فتقصي الله أعطاك ويعينا عليكم ...

أرق التحايا

غلاي كلامك صححح بس وربي فيه مبااالغه
وانا ماقلت ان الرجال كمان يتحلون الا لانه واااقع
ياما شفنا شباب بيحطو ملمع شفايف والا حاطين خصله شقراء بشعورهم والا لابسين اكسسوارات وهذا هو اللي مايسير وخطا..
اما حنا فهذي الاشياء ماصنعت ووجدت الا لنا مو لكم فليه تنكرون حقنا باستخدامها ؟؟
صحيح فيه بعض المبالغه ولكن ليس من الكل

تحياتي

فزعة

الشاب اذا لبس الغترة المنشاة وحدد اتجه المرزاب

لا يلتفت يمين ولا يسار وشامخ براسه فوق عشان الشكل لا يخرب

اليس هذا تعذيب ايضا؟