قصيدة / يا قبر

1436/4/4

يا قبر فرق بين مالك و مملوك
كل البشر عندك بليا فروقات

هذا فقير و ذاك من سالف املوك
وراك ما تقدر جميع المقامات

اللحد مثل اللحد و الفرش لا جوك
امن التراب و صار طينك مخدات

ويش عقبها يا قبر لا صرت مصكوك
واللي بجوفك بين ضيق و عتامات

ويش حال ذالمسكين لا صار ممسوك
وتساوت اعليه الليالي و الاوقات

قال القبر يا سعيد ما دمت مفكوك
اقبل على ربك و كب الملذات

ابليس واهله دربهم شوك في شوك
ولله درب ما يعرف المتاهات

يمديك تذخر مالعمل لو تبي ابنوك
و تراجع ابذا الوقت كل الحسابات

الايام تجري والعمر دوم مهلوك
ما منه يوم الا تجينا زيارات

من صار في جوفي مسجى و متروك
ما تنفعه عندي جميع الوساطات

اما يبشر بالرضا و الف مبروك
ولا عليه اقسى السخط و البليات

# ابو فارس #

صح بوحك
اختيار مميز،
عوااافي،

أبيات رائعه
الف شكر لكـ

صح بوحك
ونسأل الله ان يغفر لنا
وأن يجعل قبور موتانا روضه من رياض الجنه...

عودتنا يا بو فارس على الابداع
وهو غير مستغرب على شاعر قدير مثلك
صح الله لسانك لا عدمناك
تقبل مودتي
ابو عبدالله

اللهم اننا نعوذ بك من عذاب القبر .
صح لسانك وجزاك الله خير .