(=)( بدع ورد )(=)

البدع / عبدالله فارس الكسر المرشدي العتيبي

قم يا نديبي يـا زبـون المخاسيـر = خلك على خبـري بعيـد الهقـاوي
اركب على فكسار لوحات تصديـر =عجمـان دار مبهريـن القهـاوي
دق السويـك وسخنـه للمشاويـر =وخله على الراحة يجـر الغنـاوي
واليا استعد و بدل الصوت تصفيـر =الجيـب لبعيـد المسافـات طـاوي
إسرح مساريح النشامـا المباكيـر =من قبل نور الصبح يحل الغشـاوي
إجهم مع الجهمـة ووال المقاديـر = يا قيك من عين الحسود العمـاوي
اللي على العالـم يجـر المناشيـر = يرمي بعينه مـا يقـص العـراوي
إعرف طريقك واطلب الله تيسيـر = وجهتـك دار مهونيـن الـبـلاوي
دار الرجـال مفرقيـن الطوابـيـر = لاجـا صبـاحٍ للمغربـل ذخـاوي
عدوهـم مـا قـاد فيهـم تباشيـر = وده على عمره يسـوق الفـداوي
ورفيقهـم مـا سمعـوه المحاذيـر = لو كان في قوله عن الحق غـاوي
ومن ضافهم يلقى الدلال المباهيـر = اليا لفى جاين من البعـد ضـاوي
عقب السوالف قلطـوه المناعيـر = على الشحم لو كان منهـم دنـاوي
والعود الأزرق مشتـرا بالدنانيـر = لأجل النشامـا مجتمـع كـل داوي
رجـال طيـبٍ للمراجـل مناحيـر = ما كادهـم فعـل الجميلـة منـاوي
اليـا وصلـت ديارهـم بالتسافيـر = وشفت الحرار الموكـرة بالعـلاوي
إنشد عن اللي قاد روس المشاهير = غرمان شوق مستـرات الغطـاوي
واليا وصلت البيت من غير تدويـر = تلقاه فـي بيـتٍ للأجـواد حـاوي
سلم على غرمان من غير تقصيـر = والحاضرين اختصهـم بالتسـاوي
وانشد عن أحواله عسى حاله الخير= عساه في عمره يـذوق الحـلاوي
وعطه الكتاب اللي حوى للتعابيـر = من خاطر يا خوك دايـم صفـاوي
تسلم يمينك مـا تجيهـا العثابيـر = يومك على العدوان بالنـار كـاوي
أهديك يـا غرمـان ورد مزاهيـر = مثايـل مالـي وراهـن رجــاوي
لا نيب شاكلك من الحـب تخديـر = ولا نيب مبدلك شكـاوي هـواوي
ولا نيب شاكي من مرض كل تقرير = ولا في ما يوجب زيـارة مـداوي
ولا نيب شاكي من كثير المداويـر = والدين ما نطريه وقـت الرخـاوي
لكن أبا أرسلك من الشعـر تذكيـر = وأدري ترى مثلك على الطيب قاوي
احفظ صلاتك لا يجي منك تقصيـر = والوالدين فـي برهـم لا تـراوي
والصبر في وجه الليالي المعاسيـر = والصدق في لحظات فض الدعاوي
وخلك رحـومٍ باليتامـا المقاصيـر = يرحمك ربٍ مـا يخيـب سعـاوي
واليا لفو يمـك جمـوع المساييـر = أكرم منازلهـم وهرجـك شفـاوي
واختر طريقك لا يجي فيـه تكديـر = اليا مشيت الـدرب خلـه نقـاوي
واليا نويت تحوف درب المخاطيـر = خذ لك على اليمنى رفيقٍ مخـاوي
إختر عريب الجـد واف الأشابيـر = من ماكر الأحـرار وكـر النـداوي
واحذر مرافق راضعيـن الخنازيـر = خدوش الرجال متابعيـن الدهـاوي
والطيب فالطيـب يجيلـه نواويـر = يكسيك من فعل الجميلـة كسـاوي
وترا الردي لو سقت يمه قناطيـر = ما شاف معروفك كثيـر الشكـاوي
وحذرا من الواشي وبيت الغناديـر = اللي على النمـه يجيلـه عـزاوي
والسر خله فالخنـا أودعـه بيـر = فالصدر عن نذلٍ يشيـل الحكـاوي
واليا نويت الغوص قيـس بتقديـر = انته على نفسك من الناس تـاوي
واليا وطاك الوقت حـام الشناكيـر = لا ينثني عزمك تصيـر المشـاوي
ولخطيت في قولـي تقبـل معاذيـر = من عادة الأجواد دمـح الخطـاوي
وصلاة ربي عد مـا غـرد الطيـر = وإعداد من يمشي يسوق الخطاوي
واعداد ما تذري هبوب المعاصيـر = على نبـيٍ فـي طريقـه نجـاوي

الرد / غرمان بن عزيز

يا الله ياللـي فـي يديـك التدابيـر = يا معطي بأمـرك جزيـل العطـاوي
يا واحـدٍ صليـت لـه بعـد تكبيـر = تكبيـرة الإحـرام بأمـر سـمـاوي
ويا ماسك بأمرك طيـور العصافيـر = في الجو تسبح مـا تمـل الفضـاوي
احفظ لسانـي فـي ورود ومصاديـر = واطلبك لا تجعـل حياتـي شقـاوي
واطلبك طهرنا مـن الذنـب تطهيـر = واجعل لنـا عنـدك مقـام عـلاوي
مـن بعدهـا منـي تحيـة وتقديـر = تحيـة مـن قلـب رجـلٍ سخـاوي
وأهلاً وسهلاً يـا زعيـم المغاويـر = يا للي على خيـر المقاصيـد نـاوي
يا شاعر سطـرت الأبيـات تسطيـر = واحسنت قافك مـا حـداك الحـداوي
طبعك كريم وتعطي الشعـر تحريـر = تحرير فاهم في حـروف الهجـاوي
نسل الكرام أهـل البيـوت المعاميـر = يشهد لهم ضيـف لفاهـم ضحـاوي
وأهـل الديـار البينـة والمغاتـيـر = اللي بها وصل الكـرم كـل حـاوي
وأهل العقـول اللـي تميـز بتفكيـر = تفكير عاقل ما اختلـط بـه طغـاوي
أنتم عتيبه مـا فـي العلـم تزويـر = يشهـد لكـم تاريـخ يرويـه راوي
عدوكم فـي المعركـة جـاه تكسيـر = وأصبح على ما قيل حالـه قسـاوي
تدمّرون اللـي بغـى الغـدر تدميـر = وتذوقونـه عيـشـة المعـسـراوي
وتعزَّرونه في اللقـاء شـر تعزيـر = ما ينفعه لـو كـان طبعـه عـداوي
واللي يصاحبكـم فـلا يبغـي الغيـر = في قربكـم أكيـد يلقـى الرضـاوي
ويلقى الكرامـة زايـده دون تبذيـر = وتلبسونه مـن البشـوت الحسـاوي
أنتم فـي الموقـف رجـال أواميـر = وفـي الضيافـة مكثريـن الحفـاوي
أقولهـا صـادق وعنـدي جماهيـر = وأنا أحمد الله مـا خلقنـي خـلاوي
وأعايـر المعنـى بكـل المعايـيـر = عقلي سليم ولا حصل بـه غبـاوي
والشعر يحضر لي مـع دقـة الزيـر = أما الطـرب كـم واحـد مطربـاوي
ولا وقـع قلبـي بحـب الغنـاديـر = إلا بحيـن فـات وقـت الصبـاوي
حافظ لديني مـا سمعـت المزاميـر = وأقـرأ كتـاب الله جهـر وخفـاوي
والوالدين أسعـى لهـم دون تأخيـر = وأبذل لهـم جهـدي وكـل العنـاوي
صابر على دنيـاي وأكمـل السيـر = والصدق طبعي واقتدي بـه قـداوي
يمكن من أجل الصبر أحظى بتكفيـر = كامل ذنوبي وأصبـح أنـا التقـاوي
وأنا رحوم القلب مـا نيـب شاميـر = أدور الطيبـة ولا أبغـي المسـاوي
والضيف أنا أوفر لـه العـز توفيـر = وأنا أحمد الله ما سرى الضيف طاوي
لي عادة ما أبدي على الوجه تكشيـر = وأقـدم البرهـان عنـد القضـاوي
من فضل ربي ما حصل عندنا ضيـر = والخير موجـود مـن الله فضـاوي
واختـار درب فيـه نـور وتنويـر = وابعد عـن دروب بهـا معضـلاوي
أمشي مع العاقل ولا أقبـل طراطيـر = متنبـهٍ للغيـر مـا نـي سـهـاوي
وان جاء لي الواشـي أرده بتحقيـر =عساه يشنى اللي نوى بـه شنـاوي
وابعد عن اللي يشبهه نافـخ الكيـر = وأقرب من أهل الطيب طبعي سحاوي
واللي يشاورني أنـا صوبـه أشيـر = وأقبل نصيحـة شاعـر منصحـاوي
أفسر أقوالـي علـى خيـر تفسيـر = خوف يجي على العين بعض الغشاوي
وأهل الردى معروف مثـل الأدابيـر = وافعالـهـم مقـرونـة بـالـرداوي
وأنا على يمنـاي شيخـان ومديـر = لظامـة الخصـام عنـد الـغـزاوي
اخـوان واعمـام وربـع مساهيـر = أفعالهم توصـف بوضـح النقـاوي
هم تاج راسي هـم سيـوف مناديـر = بوجودهم ما أخاف غـدر المـلاوي
تاريخنا معروف مـا هـو أساطيـر = وأقوالنـا مأخـذوة مـن الفـتـاوي
وصلاة ربـي عـد مـا دار ويديـر = فكـرٍ مـع راعيـه عنـد الغـداوي
على رسـول حـذر النـاس تحذيـر = من يوم مـا ينفـع كثيـر البكـاوي

أعقب والله شاعر يا غرمان

مشاء الله ليش ما تشارك في شاعر المليون الجاي ؟؟؟

منين لايمتوها يا شعار شكلها من القصائد الحوليه ههههههههه

الله يصح السنتكم وبيض الله وجيهكم

تقبلو تحياتي بحر

الله لا يهينك يا ذيبان ولا يعقب إلاّ العدو والله يسلمك أهم شئ إنك عرفت إني شاعر والمشاركه في شاعر المليون وارده وارده الله لا يعوق بشر 0

ماشاء الله تبارك الله

صح لسانك يا غرمان بن عزيز

بصراحة

ما فيك حيلة وفالك التوفيق

الأخ الغالي والعزيز / جبل حرفه . ألف شكر لك على المرور الجميل بجمال أخلاقك وعساك تسلم وتبقى 0

ما شاء الله عليك يا غرمان ولد غزيز وفالك الطيب والمليون0

وليش ويني عيدك ما تسوي فيه قصيده اورزفه تليق بشواربي 0


وعفاك واليماعة كلهم

فالك السفر والقصيده وارده فيك لكن أريدا العربون ألفين ريال مقدم والباقي بعد تقديم القصيده 0

صح لسانك ياغرمان .. الحقيقة إنك مبدع في العرضة وفي النظم .. والله يقاكـ .. بما أن السابقين اللي يطلب قصيده واللي يطلب المشاركة في المليون .. أنا أبي أسئلك .. هل كتبت في الفصيح .. اتمنى لك التوفيق ..

الله يحيك يا أبو سعيد ومرورك دائماً يسعدني . أما كتابة الفصحى فقد كتبت ولكن لو يحالفيني التوفيق لما تخللها من مفردات شعبيه أفسدة القصيده وعفاك والله يقاك 0 وهذه أبيات منها :-

عجبت لمن يطلب من الرب مطلب = وهو في المعاصي وارد غير تائب
يحب الحياة ويكره الموت والرجاء = ويقنط إذا حطت عليه المصائب
عجول شفوق كل الأموال عنده = ولا يعطي المسكين يا للعجائب
يقل كل هذا المال مالي كسبته = من الجد مني ليس فيه ضرائب
ولا يدري إن الله أعطاه نعمة = هو العقل لكنه عن الشكر غائب
ومن لم يزكي ماله مات حسرة = إذا صار في الأكفان تحت الترائب
ومات ولم يبقى له غير ما سعى = وتحصى له الأعمال داخل كتائب
فإن كان خير صابه الخير وانتعم = في الجنة الخضراء ونعم الطلائب
وإن كان شر صابه الشر وأنعمى = في النار يلقى له شديد اللهائب
فيا عاقل انظر كيف دنياك حالها = وكم أحرمتنا من عزيز القرائب

ياسلام عليك صح السانك ملايين
ولك احترامي و تقديري واشهد انك مبدع

على العكس والله إنك مبدع يابن عزيز فيها كلها .. أتممتها كلها الله يتمك .. خلني أدور شيء أصعب من الفصحى .. مع أني متوقع أنك تيسر العسير .. الله يقاكـ .

حبيب وغالي يا الخطاف ومرورك شرف لي وعساك تسلم وأشكرك على هذه الشهادة التي أفتخر بها . تقبل أجمل التحايا 0

أبو سعيد أنت من أتم الجمال والإبداع لما تجود به قريحتي فشكراً لك على هذا الكلام والطيب والشهادة الغاليه عندي بل هى تآج ووسام أعلقه على صدري ما حييت وأنا تحت الخدمه فيما تأمر به وعفاك 0

ياغرمان اترك الشعر واهله منت بشاعر خلك على الكوره وكثيره عليك وفالك ريال ونص مع واحد بيبسي وشكرا لي انا نتقابل في
نتقابل في الملعب . والميدان ياغرمان
انا لا اجيزك.




عدوك : ابويزن

عسى ما شر 0
المشكله أسمك الوافي وتقول عدوك 0
أنا أبشرك ما عندي أعداء ولله الحمد 0
أما الشعر وأنا أخوك أكثر الجماعه اليوم شعراء وأكثرهم راعي كوره 0
وأنا أتعلم الشعر ولا يمنع نتعلم الكوره ولا هي كثيره علينا وخاصة إذا كنت أنت دفاع وأنا هجوم 0
وفالك الفاقوش 0
والشكر لله على كل حال 0
يادكتور غسان تكفى توسط لنا 0

أخوك في الله : أبو خزيم