( مطلوب مرافقات لاميرة بجده)

مطلوب مرافقات لأميرة بجدة السلام عليكم انا كتبت الموضوع هذا عشان اي وحده تشوف اعلان وظيفة المرافقات تقرا موضوعي
فيه وحده من العضوات اسمها ريم جده مسويه اعلان ( مطلوب مرافقات لاميرة بجده)
وانا من ظمن اللي كلمتها على هالوظيفه وارسلتلي رقمها على الخاص

راح احكيلكم قصتي واتمنى توقف هالمهزله والفلم هذا اللي سووه
في البدايه كلمتها وقالتلي اللي يبي الموظفات وكيل الاميرة واسمها ******* بنت ******* بن عبدالعزيز
اعطتني رقم الوكيل اسمه ******* الغامدي وكلمته وسالني عن اسمي وعمري سالته عن المواصلات قال يجيك السواق لغاية البيت وتروحين معاه لوحدك قلتله اوكي قال ابوك موافق على هالشي قلتله ايوه قال اعطيني ابوك وكلم ابويه وتاكد من ابويه انه موافق . هذا الكلام صار يوم السبت اللي فات

يوم الاحد اتصل على المغرب قال باخذلك موعد من عند الاميرة عشان السواق يجي ياخذك ماتجيبين معاك احد قلتله طيب خلاص قال ابوك موافق قلتله ايوة قال دقي على ابوك وتاكدي منه دقيت على ابويه وقال ليش يسال وانا قلتله موافق انها تروح مع السواق قلت يبغى يتاكد رجعت دقيت عليه وقلتله موافق بعدين شرحلي الشروط اني البس بلوزه بيضا وجنز ازرق وانه الاميرة ملتزمه عمرها 80 سنه !! وتصوم الاثنين والخميس وتفطر في مكه واذا سافرت معاها تعطيني 200 ريال غير الراتب وانه الحين هي عندها مخطط توزع منه اراضي ويمكن يشملني التوزيع

وخريجين الجامعه يقدمون عندي على وظائف واذا توظفو يعطوني نسبه من اول راتب طول الوقت وهو يغريني وقبل مايقفل قال انا بدخل على الاميرة عشان الموعد ارسلتله برساله قلتله اذا بتحددلي موعد خليه العصر او الصباح ماعجبته الرساله راح دق على ريم جده قالها صاحبتك تبغى الموعد الصباح او العصر الاميرة اصلن تصحى على المغرب

اليوم الثالث اللي هو يوم الاثنين دقت ريم جده قالت انتي ماتبغين الوظيفه قلتلها الا ابغاها قالت طيب الاميرة تصحى على المغرب قلتلها اذا عنده اعتراض يقوله لي انا ويفهمني ام شي مايكون الموعد الساعه10 او 11 قالت لالا هذا اذا كان معاك احد تتاخرين لهالوقت بس انتي لوحدك

رجعت دقيت على الوكل اللي هو ابراهيم قلتله اذا فيه مشكله بالوقت اللي اخترته ليش ماقلتلي رد علي بكل مسخره (زعلتي) قلتله خلاص احنا اتفقنا وانت كلمت ابويه قال طيب انتي موعدك بعد المغرب وكان وقتها تقريبا الساعه 6 وقال بس فيه كوافيره كمان لها موعد بس بدخل على الاميرة واقولها تاجل موعدك او تاجل موعد الكوافيره قلتله خلاص اوكي وردلي اخذ عشر دقايق ودق قال خليك جاهزه على اذان المغرب قلت اوك . طيب فكرو اليوم الاثنين والاميرة غالبا على حسب كلامه في مكه كيف دخل عليها وحدد موعد بعد المغرب بس انا ماكنت ادري انه اليوم الاثنين

كلمت ابويه وقلتله انه جاي السواق على المغرب رجعت دقيت عشان اتاكد مين بيجي قال اعتقد مافي سواق بس انا بجيك معقوله اميرة ماعندها سواق؟

قلتله طيب جيب معاك اثبات انك وكيل الاميره او تصريح ضحك باستغراب من طلبي وقال يكفي انك جايه من انسانه غاليه وعزيزه <<< يقصد ريم جده وسالني انتي تعرفينها ولالا قلتله لا عن طريق المنتدى قال كيف؟ عن طريق المنتدى وانا قلتلها تجيب بنات معروفات لكن خير انشاء الله قلتله اش فيه انا قلت بس طارت الوظيفه قلتله اجهز ولالا قال بشوف بشوف
رجعت دقيت على ريم جده قلتلها ابراهيم يقول مايبغى بنات عن طريق المنتدى و....الخ

طيب هو قفل من عندي عشان مايبغى بنات من المنتدى شوي كذا وريم دقت وقالت انتي قلتيله ان ابوك يبغى يشوف اثباته قلتلها ايوه قالت من حقه وانا قلتله من حقهم يتاكدون

طلع الاخ زعل لما طلبته الاثبات موعشان اني من المنتدى بس يسوقها علي قالتلي ريم يمكن هو ماعجبه كلامك عشان اسلوبك قلتلها لا هو اعترض لاني من المنتدى قفلت من عندي
وقلت لابويه خلاص الرجال يبغى بنات معروفات وطلع ابويه
اذن العشا ودق عليه وقال فين ابوك قلتله طلع ليش ؟ قال عشان يشوف البطايق قلتله والله طلع قالتلي عمتي قوليه انا بشوفها قلتله البطايق انا بشوفها قال طيب دقايق وانا عندكم عند البيت قالتلي عمتي خلاص مدام معاه اثبات معناته صادق لانه احنا شاكين فيه مومرتاحين له

لما وصل دق ونزلتله شفت البطايق وحده هويه والثانيه ممسووحه قديمه منتهيه صلاحيتها !!من عام 1427 !!قلتله منتهيه هذي قال يابنت انا قد ابوك لاتخافين وانا البطاقه ماعد جددتها والسياره قديمه من عهد جدي وكيل وسياره قديمه شكيت فيها والله شكله شكل راعي غنم حتى الثوب معفن توكلت على الله وطلعت من اول ماطلعت وانا استغفر وادعي انه اذا ناوي على شر الله يبعد شره عني وقام يتفلسف طبعا في موضوع ريم جده الراتب من 2500-3500هو قال راتبك بيكون 5000 وسالني عن هويتي قلتله ماهي معايه واصلن معايه في الشنطه بس مابعطيه وقلتله ليش ماطلبت مني الشهاده قال مولازم انتي بتسوين مقابله بس هذي بعدين وطول الطريق يسويلي اغراءات مشي مكان اول مره اشووفه مافي ناس هدوء وشفت فيه محطه ووقف عند قصر قال هذا قصرها وسوا نفسه يكلم جوال هذا نص المكالمه ( الو السلام عليكم انا معايه البنت عشان المقابله ..كيف؟ انتو طلعتو ؟ طيب والبنت بالله اعطيني الاميره بكلمها اقولك عطيني الاميرة؟ الو السلام عليكم طال عمرك معايه البنت كم باقي وتوصولون طيب مع السلامه الله يحفظك ) طبعا انا شفت الجوال كان كذاب ماتصل ولا حاجه قال الاميرة تتمشى في مركز الجمجوم 20 دقيقه وتجي مشي بالسياره ودخل في لفه هدووووء مره وطلع طلعه زي الجبل وظلااام ماتشوفين يدك وقلبي يدق بموت من الخوف شكله كان بيوديني استراحه مليانه شباب ولا ارض فاضيه افتكرت انه فيه محطه شفتها قلتله انا عطشاانه ابغى مويه قالي ابشري وقف عند محل قهوة وطلب قهوه تركي قلتله ابغى بطاقة شحن ماعد عرفت اش اسوي ابغى اطلع من السياره موراضي يخليني اطلع قلتله ابغى بطاقه ضروري خليته لما دار ظهره فتحت الباب ونزلت ودخلت البقاله ولزقت بواحد الله يجزاه خير ووقفلي تاكسي
رجعت البيت وكلمت ريم هذي وكنت معصبه وهي متفاجاه من اللي صار انا مابغى اضلمها يمكن متفقين مادري عنهم قالت هذا وكيل له عشرين سنه وتقول الاميرة كانت في مكه ووصلت وكان ليكي موعد قلتلها الرجال يقول في الجمجوم ويقول كان الموعد بعد المغرب كيف كذا وهي في مكه!!!!!! بس الحمدلله الله نجاني منه وانا تصرفت بس في الاخير

حسبي الله ونعم الوكيل


هذا ماكتبته فتاة بمنتدى بعد تجربتها الاتصال بسيدة نشرت اعلانا بالمنتديات

ياترى من المسؤؤل عن هذا الخطاء الفادح برائكم

مشكلة الناس في الحاجه لأي وظيفه
يمكن يسمعون عنها
وإن كان فيها مغامرات غير معروفه ..!

وللأسف كل يوم نسمع بطريقة نصب جديده وغريبه
لكن أتمنى أن يحذر الشباب والبنات ممن صعبت عليهم الوظائف
الدعاء والصبر ومابعدها إلا الفرج والله يغني عن بعض الوظائف اللي فيها
ريم المزيفه وأشكالها ..!

تسلمي يافجر على التنبيه
وأتمنى أن تكون في الحسبان دائماً ..!
وربي أعطانا العقل لازم نحسن التفكير به ..!

أطيب التحايا..

مع كل احترامي

البنت واهلها مغفلين ..!!
والمسؤول عن هذا الخطأ الفادح (اسرة البنت والبنت)


تقديري لك أختي فجر ..

المشاركة الأصلية كتبت بواسطة فجر

هذا ماكتبته فتاة بمنتدى بعد تجربتها الاتصال بسيدة نشرت اعلانا بالمنتديات

ياترى من المسؤؤل عن هذا الخطاء الفادح برائكم

الشخص نفسه هو المسؤول سواً كانت بنت أورجال عن الذهاب وراء الدعايات الواهيه ..

وهذه الفتاه يجب أن تصلي لله 100 ركعه لإنها نجت من أن تكون ضحية خطه مدبره بعنايه وحرفيه ..

كذلك الاب الدايخ ما عنده أي مانع من ذهاب إبنته مع سائق غريب ولجهه غريبه ..

فيجب الحذر من الاساليب المشابهه وعدم الثقه بها ..

فجــر
نقل وطرح مميز
دمت بعطاء

من الغباء السعي وراء مثل هذه الإعلانات
والطلبات الغريبه اللي طلبها الوكيل بالذات انها تجي لحالها ومايكون معاها احد وكرر على هالشيء توحي إن الأمر فيه شبهه !
والغريب ان اللي تحكي القصه واضح انها كانت عارفه انه نصاب
السؤال ليش استمرت ؟..
مثل هالقصص نسمع فيها ولا ندري هل هي صحيحه ام لا
واذا صحت كل اللوم على البنت والاب اللي ماحرك ساكن في الموضوع واكتفي بموافقته

شكرا والله يحفظنا بحفظه

للآسف انعدام وعي ومغفلين فعلاً
لكن يبقى بالسالفه ملابسات
مو معقول البنت تروح لطريق مجهول مع شخص غريب
مهما كانت الحاجه ماتغامر بنفسها بـ هالطريقه
/
يعطيكـ آلعآفيه فجر والله يصلح آحوال المسلمين ماظهر منها وما بطن

كل آلتقدير

هذه القصة اعتقد انها نسج خيال ووضعت للعبره قبل ان يقع الفاس في الراس .

انا اعتقد لايمكن لبنت تخاف الله وتتقيه وتعرف دينها وشرع ربها ان تقدم على مثل هذه الخطوه الخطره جدا .

وظيفه ؟؟ طيب ما في مشكله تذهب هي ووالدها الى المكان الذي فيه الوظيفه وتقدم اوراقها ويتأكد والدها من المكان ومن نوعية العمل ومع من وكيف صيغة العمل ومميزات الوظيفه والدوام وماهو نوع العمل الذي تقوم به ابنته .

لكن ان نرمي بانفسنا بهذه الطريقة الغبيه بحجة العمل .!!! كلام فاضي .

لو انتهك عرضها ودنس شرفها وش الفايدة من العمل ؟
اكرر لااعتقد صحة القصة ولا يفعلها الا متخلف نسأل الله السلامه .

فجر / اشكرك على غيرتك وعلى نقلك لهذه القصة للاعتبار قبل ان تقع فيها فتاة مسلمة بارك الله فيك .

السلام عليكم ورحمة الله وبركاته



الحمد لله الذي عافانا مما ابتلاهم به وفضلنا على كثير من خلقه



اسأل الله القائل : {فَاقْصُصِ الْقَصَصَ لَعَلَّهُمْ يَتَفَكَّرُونَ }

ان يجزيك يا (فجر الخير) خير الجزاء على مثل هذا الطرح

من فضل الله وكرمه ان جعلنا من بيئة محافظة لم تمر علينا مثل هذه



القصص فنستنكرها ولا يتقبلها العقل لغرابتها لكنها حصلت وقد تتكرر

مرت علينا في الجرائد اكثر من مرة ان الامير الفلاني او الاميرة ال علانية



تعلن في الجريدة تبرأهم من الوكيل الفلاني لاستغلاله اسم الامير او الاميرة



في امور مشبوهة سواء مادية او اخلاقية



حين يكتب الله لي الاجتماع مع بعض الاخوات الفاضلات من تذهب الى



زيارة السجون ا و دور الفتيات(الدار التي ترعى الفتيات المنحرفات)



للوعظ والنصح نسمع من القصص الغريبة المخيفة التي نعجب من



وقوعها في مجتمعنا وان كانت حالات فردية



بعضها لا يمكننا حتى النقاش فيه من قوة غرابتها



ومن المؤلم والمؤسف حين من يلمس من هي في بداية طريق مشبوه



ويحاول بل يجاهد في صدها والوقوف في طريقها



ويحتاج احيانا لطلب العون بعد الله تعالى ممن يعدهم من الاخيار



ممن لديهم القدرة لمساندتها باي وسيلة اصلاح قويم



وعودتها الى الطريق المستقيم وفي منتهى الكتمان



تكون ردة الفعل سلبية و ومحبطة لابعد الحدود

ولو انه حين يقع مالا يحمد عقباه يستر ويطوى ولا يروى للعامة



بل تكتب بالخط العريض في صفحات الجرائد وتتداولها المنتديات
وحينها اذن نضع الحلول والنظريات

نسال الله السلامة والعافية والستر لبناتنا وبنات المسلمين في اصقاع الارض

فجر ..
أشكر لك مثل هذا الموضوع اللي بالأخير الهدف منه توعوي بشكل ممتاز ..
ولكن تعليقاً على الموضوع فأنا أقول لا يمكن أن يدخل رأسي مثل هذا الحدث ..
أنت مجرد ناقله وأشكرك أكيد ولا علاقة لك بعدم اقتناعي بالموضوع وهذا للتوضيح فقط ..

طريقة النشر لطلب موظفة بمنتدى ..
طريقة الاتصال وما صاحبها ..
بداية الحوار بين الطرفين ..
اللقاء الأول بين السائق والفتاة ونوعية الحوار..
موقف والد الفتاة من الموضوع برمته..
الطلب الذي طلبته منه لأجل التوقف ومن ثم الهروب ..
عدم حاجة الأميرة أصلاً لمثل هذه الطريقة للحصول على موظفة ..
عدم قدرة السائق على استغلال موقعه بهذه الجرأة وتشويه صورة الأميرة ..

كلها مسببات تجعلني لا أصدق حدوث ما تم ذكره ..
كل التقدير ..

المسؤول هنا الاب اللي يفك بنته

مع سواق ان شاء الله يكون سواق مدري مين

وظيفه انا اروح مع بنتي وامها معها يمشي قدامنا

واذا وصلنا تدخل الام معها والاب للتأكد من صحة الخبر او يعطيني رقم الاميرة

تحيتي لك فجر

سواءاً كانت القصه حقيقه ام خيال
==
على الرغم من التطور التقني والفني في المجتمعات ,, وعلى الرغم من ان كل واحد يسمع قصص زي ذي واشنع منها كثير
الا ان السذاجه لها دور في الموضوع ,, الاب دايخ والبنت مثله وازود ,,
والا من متى ومتديات الانترنت تعرض وظائف بالشكل المشبوه ذا
(( احياناً الذيب مايعدي في الغنم لانه مو منتبه لها ,, لكن تطلع له شاه جاهزه تغريه بنفسها ))
==

مع احترامي فئة مسئولية على الاهل بس المنتدى كيف يقبل طرح اعلان دون التاكد منه الناس في حاجة وظائف على كل انسان تحري الدقة قبل يغمر في اي وظيفه شكراً فجر

فجر دائماً تقديم طرحاً رائع .. وذا هدف جميل

لك التقدير على هذا الموضوع ..

وحقاً إن من القصص لعبره ..

الاخوان والاخوات حياكم الله وبياكم

منكم من تاثر ومنكم غير ذلك

قبل ما اطرح هذا الايميل عشت ردة فعل كل واحد منكم

صدقت ثم انتقدت ثم كذبت الخبر

ولكن لا استبعد صحة الخبر اكثر من عدمه

لان مجرد سماع اسم امير ولا اميره له احترامه فكيف بصحبتهم وخاصة للمحتاجييييين((اللهم اغننا بفضلك عمن سوك يارب))

انا الؤؤؤؤؤؤؤؤم الاب مليووووووون مرررررررررره ولا ابرر البنت ولكن لومها ليس بحجم لؤم الاب

هناك ملاحظه البنت راحت وقت صلاة العشاء يعنى الاب خارج البيت ويمكن كان ناوى يقابل الوكيل المحترم لكن الوكيل يبدؤ انه ذكى وخبيث

والشئ لثانى البنت بعد مافلتت من هذا الخبيث لم تتصل بوالدها وتبين له الحادثه او بالدوريات لكن طبلت الموضوع واستعانت بمن دبر لها ليموزين

يعنى كانت بتزيد الطين بله

والبنت كانت بتقابل سموها يعنى اكيد بكامل زينتها .........

وانا كان هدفى من طرح هذه القصه لعلنا نكون سبب بتوعية الاباء من بعض حركات البنات البرئيه ولكن نتائجها وخيمه

حكتنى إحدى الاخوات عن قصة هى شاهدتها


بان طالبه بالثانوى تذهب مع امها لبيت زميتها بين فترة واخرى للمراجعه والمذاكره مع بعض

واصبح الامهات صديقات لهم جلستهم وقهوتهم والبنات بالغرفه لهم جلستهم وكل زياره على ذا الحال

وفى احدى المرات حصل ظرف واطرت الام للعوده قبل ان تعلن البنت العوده كالمعتاد وإذا بها تكتشف ان بنتها ليست بالغرفه وكل زياره كانت تخرج مع اخو البنت من الباب الثانى
وحدث ولاحرج عما اصاب الام )

اللهم استرنا واسترنا بناتنا وبنات المسلمين فوق الاض وتحت الارض ويوم العرض

معذرة
رد كل عضو يستاهل المنقشة لوحده ولكن لضيق الوقت لديه تقبلوا معذرتى
وشكرا لمشاركتكم