برى المملكه ونا رايح غرفتى فى الفندق

>>>>>>>>
>>>>>>>
>>>>>>

بسم الله الرحمن الرحيم
السلام عليكم


الى صار بالضبط فى الهند :
ماشى على مهلى فى الممر الواسع داخل هذا الفندق ورايح للغرفه...لمحت على يسارى فى الناحيه الثانيه من الممر
الا فيه رجال سعودى مهيوب لابس ثوب وغتره بيضا من غير عقال ومعاه حاشيه (قليل مو كثير) من اجانب و شخصيات هنديه ماشين معه مقبلين على ناحيتى يبغون يروحون الجهه الثانيه .....كنت اطالع فيهم عادى جداً...... الا كنهم قربوا زياده و يقربون اكثر من السعودى كنهم يسمعون اوامره او زى كذا.... وبدا يثقل مشيهم.....شويه وجات عينى فى
عين هذا الرجال السعودى ....فجأه حط يده على صدره و يبغى ينهار يطيح على ورا و الى حواليه بسرعه مسكوه من يمينه و يساره .....و يشد وجهه يتألم قال لى بإسمى الصحيح طبعاً( مو الى فى المنتدى).. بصوت واضح يا فـــلان شوف لى سرير ......طبعاً طاح مزبوط صاروا الى معه ماسكينه و ساندينه ...

صارت حاله من الدربكه ......صحت على الى ماسكينه بالأنقليزى جلسوه على الكرسى الى جنبكم يا هنود......و ناظرت
من الناحيه الثانيه للممر فيه عربه و حولها العمال حقين تنظيف الغرف(هاوس كيبنق) و أزئر فيهم .....جو يهرولون ....قلت افتح هذى الغرفه .....افتحهااااا....بصوت عالى ..وكانت هيه اقرب غرفه لنا فى هذا المكان...دخلوا هذا السعودى ....مع الباب و طبعاً قد طاحت غترته و طاقيته .....وكأن حقين الهاوس كيبنق عرفوه......واصيح عليهم...اطلبوا لى دكتور ذلحين.....و ابغى اسعاف بسرعه.....طبعاً حطوه على السرير وكان قريب من الباب و خرجوا الحاشيه الى معه ...كل واحد عنده شغله مهمه...ومستعجلين .....دخلت الغرفه انا وحق الهاوس كيبنق الى عند راس الشايب.....الا هو يقولى هذا الشايب من ثلاثين سنه....كل سنه يجى ....و عمره 103 سنوات....و من سنتين بدا يتعب و ياخذ ادويه.

المهم
....قاعدين يرتبون السرير من حواليه .......وهو مغمى عليه .....وابحلق فيه مش معقول هذا عمره 103 ....مستحيل يكون اكثر من اربعين سنه ما شاء الله عليه.....
ونا اطالع فيه فتح عيونه و لمحنا حواليه ابتسم بسرعه و بصم....بعدين مسح وجهه مرتين ....وقال أستغفر الله أستغفر الله أستغفر الله...اللهم اغفر لى و توب علي لا اله الا الله محمدُ رسول الله
وهجد شويه و أظن أغمى عليه ثانى.....بعدين ميل راسه ناحية اليمين ناحيتنا .....و طرش مرتين زى اللعاب او شوربه خفيفه.....ورجع هجد ثالث مره و فجأه رفع راسه من السرير ....و يتشدق من الألم و يناظرنا كنه مخنوق و كنه يبغانا نساعده و يهز السرير هز....فى نفس اللحظه دخل واحد مع الباب ومعاه الحاشيه الأولين جايين علينا طالعنا فيهم....الا هم يطالعون فى الشايب و يقول اولهم خلاص مات الوالد مات الوالد....ولف و رجع ناحية الباب ويطلع الجوال....ما قرب من ابوه حتى.....لفيت اشوف الشايب الا راسه معووج على ورى و رقبته قد امعصت كلها ثوانى.....اعوذ بالله دوبى اطالعه
بس لفيت على الى داخلين و رجعت اناظره...........و الله و افز من النوم مفجوع .......وافطر مع اهلى و اكتب لكم ماحصل من حلمن الله لا يجعله علم.....و بلحق صلاة الجمعه
سلام