معَ اوَّل الوسم رُزْم السَّحْب برعوده

بسم الله الرحمن الرحيم

معَ اوَّل الوسم رُزْم السَّحْب برعوده=وانْياضها ابْروق خيرٍ يجْتبي اسْحابه
تَمْعي له اهْبوب ريح الوقت واتْقوده=مسْياره العام عوّد من ورا قْطابه
لا من هدا جوّها المغرب مع نوده=سجيت رجلي على قفْره في اشْعابه
أساير العمر خطوه من ورى الْحوده=خلْفه ودونه لقيت النفس توَّابه
اللي من الْباس ثوب الطيب مجروده=مثْل أعْكَر الماء لا من ضَمْيْ شرَّابه
لاترتجي نفْعهُ وْلا ترتجي جوده=لنَّه مع النار فاالرمضاء متْشابه
اليوم يومَه عرَك والخيل مصْفوده=اللي بسيفه معه واللي بمشْعابه
مطاولٍ من عتيق الغمْد مشهوده=تدْني له ارْقاب عدوانٍ وتقْنابه
الْيا دعا صوتها وانْشاك باروده=وفْزِع بها والمنادي شب مضرابه
خلْفه معاشيب قنَّاتٍ مع اسْنوده=قايد بها فالمعارك خيرة اللابه
متهاودين السيول وكبْر جلْموده=لا من تلجَّم على العدوان حرَّابه
اللي احتما خلف مشهابٍ ورى طوده=واللي احتما بين ريضانٍ ورى اهْضابه
واللي غدا في سعير النار بسْفوده=ونا على الطود والنيران شبَّابه
أنا حميّ الشّعِر من ناس عن ذوده=أهيج به ساعةٍ وآنوّخ اركابه
شاعر ولا زاعلي والشعر مقْنوده=يوم الشِّعِر عند بعض الناس تهيابه
الجعْري يثعا له الجيفه من أْسُوده=والذيب لو مات جوعٍ ماثعا اذْيابه
الذيب لا من عوى بيَّح بمسْدوده=مايعوي الا طنا من راس مرقابه
والناس للحق طراده ومطروده=ونا مدوّر حقوقي وسْط هاالغابه
فنْ كان فيها امور الشعْر مهْدوده=الصقر يشبَع بهدَّه وضرب مخلابه

من قصائد/عبدالعزيز بن ناصر بن عايض القرني