ومن غاص غبّات البحر جاب درّا

قصيدة للإمام تركي بن عبد الله بن سعود

طار الكرى عن موق عيني وفّرا=وفّزيت من نومي طرالي طـواري
وابديت من جاش الحشا ما تـدرّا=واسهرت من حولي بكثر الهذاري
خـط ٍ لفانـي زاد قلبـي بحـرّا=من شاكي ٍ ضيم النيا والعـزاري
سر يا قلم واكتب على مـا تـورا=أزكى سلام ٍ لابن عمي مشـاري
شيخ ٍ على درب الشجاعة مضرّا=من لابةٍ يـوم الملاقـا ضـواري
يا ما سهرنا حكمنـا مـا يطـرّا=واليوم دنيا ضاع فيهـا افتكـاري
أشكي لمن يبكي له الجـود طـرّا=ضرّاب هامات العدا مـا يـداري
يا حيف يا خطو الشجاع المضـرّا=في مصر مملوك ٍ لحمر العتـاري
من الزاد غاد ٍ له سنـام ٍ وسـرا=من الذل شبعان ٍ من العز عـاري
وش عاد لو تلبس حرير ٍ يجـرّا=ومتّوج ٍ تاج الذهـب بالـزراري
دنياك يابن العـم هـاذي مغـرّا=ولا خير في دنيا حلاهـا مـراري
تسقيك حلو ٍ ثـم تسقيـك مُـرا=ولذّاتها بيـن البرايـا عـواري
إكفخ بجنحـان السعـد لا تـدرّا=العمر مـا ياقـاه كثـر المـداري
ما في يد المخلوق نفـع ٍ وضـرا=ما قدّر الباري على العبد جـاري
واسلم وسلم لي على مـن تـورّا=واذكر لهم حالي وما كان جـاري
إن سايلوا عنـيّ فحالـي تسـرّا=قبقب شراع العز لو كنـت داري
يوم ان كل ٍ مـن عشيـره تبـرّا=حطيت الاجرب لي عشيرٍ مبـاري
رميت عني برقـع الـذل بـرّا= .ولا خير فيمن لا يدوس المحاري
نعم الصديق ليا سطـا ثـم جـرّا=يودع مناعيـر النشامـا حبـاري
ونزلتها غصـب ٍبخيـرٍ وشـرّا=وجمعت شمل ٍ بالقرايـا وقـاري
وحصّنت نجد ٍ عقب ماهي تطـرّا=مصيونة ٍ عن حر لفح الـذواري
والشرع فيها قد مشى واستقـرا=ويقرا بنا درس الضحى كل قاري
زال الهوى والغي عنهـا وفـرّا=ويقضي بنا القاضي بليا مصاري
وان سلت عمن قال لي لا تـزرّا=نجد ٍ غدت باب ٍ بليـا سـواري
ومن أمن الجاني على مـا تحـرا=وتازا حريمه بالقرايـا وجـاري
واجهدت في طلب العلا لين قـرّا=وطاب الكرى مع لابسات الخزاري
ومن غاص غبّات البحر جاب درّا=ويحمد مصابيح السرى كل ساري
وانا احمد اللي جاب لي ما تحـرا=واذهب غبار الذل عني وطـاري
والعمـر مـا يـزداد مثقـال ذرا=عمر الفتى والرزق في كف باري
وصلاة ربي عد مـا خـط بالـرا=على النبي ما طاف بالبيت عاري